Dźmitryj Kisialoŭ nie adčuvaje viny za toje, što adbyłosia na Danbasie
U Minsk pryjechaŭ hiendyrektar MIA «Rośsija Siehodnia», viadomy prapahandyst Dźmitryj Kisialoŭ. Učora jon sustreŭsia ź ministram zamiežnych spraŭ Uładzimiram Makiejem, a siońnia ŭ Domie Maskvy prajšła jaho sustreča z žurnalistami. U sustrečy ŭziała ŭdzieł ministr infarmacyi Biełarusi Lilija Ananič.
«My pracujem u Biełarusi daŭno, a siońnia prosta adkryvajem novuju prastoru [biełaruski partał «Sputnik» uvachodzić u strukturu «Rośsija siehodnia»], — skazaŭ Dźmitryj Kisialoŭ. — Mety prysutnaści ŭ Biełarusi nie adroźnivajucca ad metaŭ pracy ŭ śviecie — farmiravańnie spraviadlivaha vobrazu Rasii. Ale ŭ dačynieńni Biełarusi jość adna karekciroŭka — u nas Sajuznaja dziaržava, jak raz u hetyja dni my adznačajem jaje jubilej, tamu i ŭjaŭleńni pra naš sajuz taksama majuć być spraviadlivymi. My siabie nie adździalajem ad braterskaha biełaruskaha narodu. Chočam, kab u vas była mahčymaść raźvivacca bieź pieraškod zvonku», — dakazvaŭ Kisialoŭ.
Lilija Ananič u svaju čarhu zapeŭniła hościa, što, na jaje dumku, biełarusaŭ i ruskich «źviazvajuć tysiačahadovyja karani svajactva» i taksama dadała, što jaje viedamstva razam ź Ministerstvam suviazi Rasii raspracoŭvaje płan stvareńnia supolnaj infarmacyjnaj prastory Sajuznaj dziaržavy, jaki, maŭlaŭ, budzie pryniaty na ŭzroŭni rady ministraŭ Sajuznaj dziaržavy.
Potym ministarka Ananič i Kisialoŭ pačali adkazvać na pytańni z zały.
Zadaŭ pytańnie Kisialovu i žurnalist «Našaj Nivy». U Biełarusi zaviedziena 135 kryminalnych spraŭ na hramadzian, što brali ŭdzieł u bajavych dziejańniach va Ukrainie, skazaŭ jon. Niektoryja chłopcy, što vajavali za DNR, pryznali u intervju «NN», što adpravilisia vajavać pad uździejańniem prahram telekanała «Rasija», niekatorych ź ich užo niama ŭ žyvych. Ci adčuvajecie vy vinu za datyčnaść da śmierci hetych ludziej, a taksama za pałamanyja losy tych, chto ciapieraka nie moža viarnucca na radzimu praz kryminalny pieraśled, — spytalisia my.
Kisialoŭ u adkaz skazaŭ, što nie adčuvaje viny za «hramadzianski pieravarot» va Ukrainie, za «kasietnyja bomby, što skidaŭ kijeŭski režym na mirnyja hołavy danieckich hramadzian», za «katavańni, što ładzili nacyki z karnych bataljonaŭ» i za raźviazanuju hramadzianskuju vajnu. Jon taksama dadaŭ, što ŭ karespandenta «Našaj Nivy» sumbur u hałavie.
Žurnalistka «Narodnaj voli» spytałasia ŭ Kisialova, ci nie baicca jon, što «Sputnik-Biełaruś» paŭtoryć los łatvijskaha adździaleńnia ahienctva, jakoje začynili. Maŭlaŭ, paśla rasijskaha ŭvarvańnia va Ukrainu i ŭ Biełarusi źbirali podpisy za abmiežavańnie pakazu navinaŭ rasijskich kanałaŭ, što nasadžajuć ideałohiju h.zv. ruskaha śvietu.
«Daj boh zdaroŭja ruskamu śvietu, dziakuj bohu, što my žyviem u im, — skazaŭ u adkaz Kisialoŭ, — Jon akazvaje «obłahoraživajuščieje vozdiejstvije» na cyvilizacyju, što vidać u Siryi i inšych miescach. A ŭ Łatvii zakryli «Sputnik», bo bajacca svabody słova».
Adkazvajučy na nastupnaje pytańnie radyjo «Svaboda», Kisialoŭ abrynuŭsia na «Svabodu» z krytykaj. Skazaŭ, što «Svaboda» zajmajecca brudnaj žurnalistykaj, suprać jakoj vystupaje «Rośsija siehodnia». A ŭsia reč u tym, što «Svaboda» spytała pra afšory Pucina. Pa sutnaści ž Kisialoŭ skazaŭ, što «daviaraje prezidentu».
U svaju čarhu, ministr infarmacyi Biełarusi Lilija Ananič zaznačyła, što hałoŭnaje, kab žurnalistyka zastavałasia česnaj i niepieraduziataj, bo ŭ čas internetu praŭda abaviazkova vylezie. Nje napiša adzin, dyk napiša druhi, skazała jana.
Fota Iryny Arachoŭskaj.
«Na Zachadzie vobraz Biełarusi składajecca sa štampaŭ, heta prymityŭny vobraz», — pierakanany Kisialoŭ. A «Sputnik» budzie prasoŭvać jaje pazityŭny vobraz, zapeŭniŭ jon.
Taksama ŭ rasijskaha prapahandysta zapytalisia, jakuju pazicyju zojmie «Sputnik», kali pamiž Biełaruśsiu i Rasijaj adbudziecca infarmacyjnaja vajna kštałtu tych, što ŭžo byvali.
Kisialoŭ u adkaz skazaŭ, što nie zajmajecca infarmacyjnymi vojnami. Ciaham kanfierencyi jon uvohule vielmi časta nazyvaŭ siabie «žurnalistam» i ŭsialak imknuŭsia heta padkreślić.
«Infarmacyjnymi vojnami zajmajucca ZŠA, a nie my», — skazaŭ Kisialoŭ.
U svaju čarhu Ananič zapeŭniła, što, jak ministr, budzie rabić usio, «kab nie dapuścić infarmacyjnaj vajny pamiž Biełaruśsiu i Rasijaj».
Pasoł Rasii ŭ Biełarusi Alaksandr Surykaŭ. Fota Iryny Arachoŭskaj.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary