Statkievič: Treba, kab na kožnaj akruzie było tolki pa adnym kandydacie ad apazicyi

«U Biełarusi bolšaść užo zrazumieła, što na našych vybarach nie ličać hałasy. Tym nie mieniej, amal usie apazicyjnyja partyi vyrašyli brać udzieł u vieraśnioŭskaj parłamientskaj kampanii. Arhumientaŭ na karyść takoha padychodu šmat. Ale ja pra inšaje», — piša ŭ svaim fejsbuku Mikałaj Statkievič.

Pavialičyć

«Vyniki «vybaraŭ» viadomyja ŭładzie da ich pačatku. Ale adna sprava, kali ŭ demakratyčnych kandydataŭ ukraduć ichniuju pieramohu. I zusim inšaja, kali demakraty ŭkraduć jaje sami ŭ siabie.

Ad ułady ŭ kožnaj sa 110 vybarčych akruhaŭ budzie tolki pa adnamu kandydatu. Kali b apazicyja zdoleła damovicca i vystavić u kožnaj z akruhaŭ taksama pa adnamu svajmu kandydatu, to hetyja demakratyčnyja kandydaty, z ulikam sacyjalna-ekanamičnaj situacyi ŭ krainie, mieli b dobryja šancy atrymać pieramohu pry sumlennym padliku hałasoŭ. Tamu abjadnańnie apazicyi prymusiła b režym pajści na brutalnyja falsifikacyi, vidavočnyja dla vybarščykaŭ i mižnarodnaj supolnaści. 

Ale na siońnia abjaŭlena ŭžo pra 6 apazicyjnych śpisaŭ kandydataŭ. I heta jašče nie kančatkovaja ličba. Kali u kožnaj akruzie adzinamu kandydatu ad ułady budzie supraćstajać da 6-7 apazicyjnych kandydataŭ, jakija raściahnuć pamiž saboj pratestny elektarat, to ŭłada budzie zdolna vyjhrać takija vybary navat pry realnym padliku hałasoŭ.

Admovaj ad vyłučeńnia adzinaha śpisa kandydataŭ apazicyja kradzie pieramohu ŭ samoj siabie. Dziela harantyi režym skarystajecca i falsifikacyjami, ale ŭ nastupnaha «parłamienta» buduć vialikija šancy na mižnarodnaje pryznańnie.

Vidavočna, što rašeńnie pravacentrystskaj kaalicyi ŭ adnabakovym paradku vyłučyć svaich kandydataŭ u 90% akruhaŭ - kančatkovaje. U takoj situacyi adzinaje, što možna jašče zrabić, heta pamieńšyć škodu dla demakratyi ad šmatlikich apazicyjnych śpisaŭ. 

Ja liču, što Kanhres demakratyčnych siłaŭ pavinien pryniać miechanizm vyznačeńnia pa adnamu najbolš aŭtarytetnamu kandydatu ŭ kožnaj z akruhaŭ. Naprykład, heta mohuć być rekamiendacyi rehijanalnych kaalicyj demakratyčnych siłaŭ. Z hetych kandydataŭ pavinien być sfarmavany abjadnany jeŭrapiejski śpis. Aŭtarytetnyja ŭ biełaruskim hramadstvie asoby pavinny zaklikać vybarščykaŭ da hałasavańnia tolki za kandydataŭ z abjadnanaha śpisa i akazać im palityčnuju i infarmacyjnuju padtrymku. Realizacyja takoha miechanizmu pavinna być adnoj ź bližejšych zadačaŭ pastajannaha kaardynujučaha orhana, stvoranaha kanhresam demakratyčnych siłaŭ.

Kali ŭ častki apazicyjnych partyj nie chapaje pačućcia adkaznaści dla abjadnańnia, to hramadstva pavinna dapamahčy im».

• 0
• 0
• 0
• 0
• 0
• 0
• 0
• 0