U Minsku prajšli adzinočnyja pikiety ŭ padtrymku Nadziei Saŭčanka FOTA
Siońnia ŭ druhoj pałovie dnia la ambasady Rasijskaj Fiederacyi adzin za adnym adbylisia dva adzinočnyja pikiety ŭ padtrymku Nadziei Saŭčanka. Pravaabaronca Natalla Haračka-Basałyha i kinadakumientalist Volha Nikałajčyk z partretam Nadziei źviartalisia da minakoŭ i kiroŭcaŭ z zaklikam nie zastavacca abyjakavymi i padtrymać zapłanavanuju na zaŭtra, 18 krasavika, hramadskuju akcyju, meta jakoj – uratavać Nadzieju Saŭčanka.
Natalla Haračka-Basałyha: «Ja pryjšła, kab vykazać svoj pratest uradu Rasijskaj Fiederacyi, pa zahadzie jakoha była vykradziena ŭkrainskaja lotčyca Nadzieja Saŭčanka. Jana moža pamierci ŭ luby momant, i ŭ mianie niama času brać niejkija dazvoły.
Takoha samaŭpraŭstva śviet jašče nie viedaŭ. Dyviersantami vykradzieny aficer armii, niezakonna pieraviezieny na terytoryju Rasijskaj Fiederacyi i asudžany pa dziejańniach, jakich jon nie ździajśniaŭ.
Zaŭtra ŭ 12.30 tut budzie bolš ludziej, tolki z majoj arhanizacyi («Pravavaja dapamoha nasielnictvu») budzie, ja miarkuju, 50-60 čałaviek, my čakajem i inšych. Nieabyjakavych ludziej šmat».
Vypadkova ci nie, za chvilinu da našaj razmovy da pikietčykaŭ padjechaŭ «čałaviek z rydloŭkaj». Hetym razam da rydloŭki sprava nie dajšła, ale ŭsich zhvałcić dy zabić, pakryŭšy matam u tym liku milicyjanta, jon u čarhovy raz paabiacaŭ.
Adnoj z metaj aktyvistak było daznacca, što takoje ŭ našaj krainie adzinočny pikiet. Niahledziačy na toje, što zakanadaŭča adzinočnyja pikiety mohuć adbyvacca biez aficyjnaha dazvołu, abiedźvie aktyvistki (paasobku) byli zatrymanyja, na ich składzienyja administratyŭnyja pratakoły. Abiedźvie admovilisia ich padpisać, razumiejučy pry hetym, što paźbiehnuć štrafu nie atrymajecca ŭ lubym vypadku.
Natalla Haračka-Basałyha: «Mianie drobna štrafujuć. Za apošnija paru tydniaŭ pryznačyli vypłacić usiaho 13 miljonaŭ, hetuju sumu ja pakul mahu vydatkavać z ułasnaha biudžetu. Ale ŭ nas jość ludzi, u jakich niejmaviernyja štrafy – tam užo hramada dapamahaje».
Volha Nikałajčyk: «Maja «taksa» – 10, 5 miljonaŭ. Za apošnija paŭtara miesiacy mnie pryznačana da vypłaty bolš jak 120 miljonaŭ rubloŭ. Źviartajusia pa dapamohu, ale ciapier mušu pradavać kvateru, kab pačuvać siabie bolš upeŭniena. Pradam kvateru tut i kuplu niešta va Ukrainie. Bo tam maja Nadzieja. Tam pakul što spraŭdžvajucca našyja mary i šmat pracy. Budu žyć na dźvie krainy».
Kamientary