U siaredzinie krasavika ŭ łatvijskim Daŭhaŭpiłsie babior napaŭ na čałavieka. Toje, što adbyłosia ŭ toj dzień, nahadvaje žudasny tryler.
13 krasavika prykładna a hadzinie nočy mužčyna pa imieni Siarhiej viartaŭsia dadomu paśla sustrečy ź siabrami. Raptam jon ubačyŭ, jak prosta na jaho biažyć babior.
Mužčyna pasprabavaŭ adpudzić jaho, ale «kyš-kyš» žyviołu nie spyniła, i jana ŭčapiłasia ŭ levuju nahu. Pačałasia bojka: Siarhiej adkinuŭ babra i pasprabavaŭ jaho ŭdaryć. Babior nie zdavaŭsia i zmoh pavalić mužčynu na ziamlu.
Paśla hetaha žyvioła nie stała dabivać čałavieka, a ŭziała jaho ŭ pałon.
Pakul Siarhiej lažaŭ na ziamli, babior jaho nie čapaŭ i prosta siadzieŭ pobač, ale ŭhryzaŭsia ŭ nahu kožny raz, kali mužčyna sprabavaŭ padniacca.
Ležačy na ziamli, Siarhiej patelefanavaŭ u słužbu vyratavańnia, ale tam nie pavieryli ŭ historyju z napadam babra i pakłali słuchaŭku.
Tady mužčyna datelefanavaŭsia da svajho siabra — toj taksama spačatku nie pavieryŭ u jaho apovied, ale pahadziŭsia pryjechać.
Ale jaho pa šlachu spyniła darožnaja palicyja. Kali jon raspavioŭ, što imčycca ratavać tavaryša ad babra, palicejskija paprasili jaho padźmuć u trubačku.
Pierakanaŭšysia, što siabra Siarhieja ćviarozy, palicyjanty pajechali razam ź im i vyratavali čałavieka, vyklikaŭšy chutkuju. Mužčynu zašyli nahu i pryznačyli kurs ukołaŭ, nastupać na levuju nahu jon pakul nie moža.
U słužbie vyratavańnia zajavili, što zvanka ad Siarhieja nie pastupała. Pa słovach pradstaŭnika pažarna-vyratavalnaj słužby, zafiksavanaje tolki telefanavańnie ad palicejskich. Paśla hetaha na miesca zdareńnia vyjechali ratavalniki, znajšli babra i vypuścili jaho ŭ niejki vadajom.
Dyrektar Łathalskaha zaasada, bijołah Michaił Pupińš papiaredziŭ: babry — nie takija miłyja, jak zdajucca. Heta žyvioły vahoj da 40 kiłahramaŭ z vostrymi zubami, jakija nie lubiać, kali ich čapajuć abo na ich šlachu akazvajecca pieraškoda.
Pa słovach Pupińša, pry sustrečy z babrom treba ŭciakać:
«Babior dosyć chutka biehaje, ale na doŭhaj dystancyi vašyja šancy ŭzrastajuć. Pryčym ŭciakać lepš piatlajučy, sprabujučy zabłytać jaho i schavacca z vačej. Uskaraskacca na dreva — taksama dobry varyjant. Babior nie jeść ludziej. Jaho ježa — drevy. Tak što ŭ jaho nie spracuje ŭ hałavie scenar «pierahryźci stvoł dreva, na jakim siadzić čałaviek, kab zdabyć čałavieka».
Ciapier čytajuć
«Mielnikava pazyčała hrošy aktyvistam u Varšavie i nie prasiła viarnuć»14
Kamientary