У сярэдзіне красавіка ў латвійскім Даўгаўпілсе бабёр напаў на чалавека. Тое, што адбылося ў той дзень, нагадвае жудасны трылер.
13 красавіка прыкладна а гадзіне ночы мужчына па імені Сяргей вяртаўся дадому пасля сустрэчы з сябрамі. Раптам ён убачыў, як проста на яго бяжыць бабёр.
Мужчына паспрабаваў адпудзіць яго, але «кыш-кыш» жывёлу не спыніла, і яна ўчапілася ў левую нагу. Пачалася бойка: Сяргей адкінуў бабра і паспрабаваў яго ўдарыць. Бабёр не здаваўся і змог паваліць мужчыну на зямлю.
Пасля гэтага жывёла не стала дабіваць чалавека, а ўзяла яго ў палон.
Пакуль Сяргей ляжаў на зямлі, бабёр яго не чапаў і проста сядзеў побач, але ўгрызаўся ў нагу кожны раз, калі мужчына спрабаваў падняцца.
Лежачы на зямлі, Сяргей патэлефанаваў у службу выратавання, але там не паверылі ў гісторыю з нападам бабра і паклалі слухаўку.
Тады мужчына датэлефанаваўся да свайго сябра — той таксама спачатку не паверыў у яго аповед, але пагадзіўся прыехаць.
Але яго па шляху спыніла дарожная паліцыя. Калі ён распавёў, што імчыцца ратаваць таварыша ад бабра, паліцэйскія папрасілі яго падзьмуць у трубачку.
Пераканаўшыся, што сябра Сяргея цвярозы, паліцыянты паехалі разам з ім і выратавалі чалавека, выклікаўшы хуткую. Мужчыну зашылі нагу і прызначылі курс уколаў, наступаць на левую нагу ён пакуль не можа.
У службе выратавання заявілі, што званка ад Сяргея не паступала. Па словах прадстаўніка пажарна-выратавальнай службы, зафіксаванае толькі тэлефанаванне ад паліцэйскіх. Пасля гэтага на месца здарэння выехалі ратавальнікі, знайшлі бабра і выпусцілі яго ў нейкі вадаём.
Дырэктар Латгальскага заасада, біёлаг Міхаіл Пупіньш папярэдзіў: бабры — не такія мілыя, як здаюцца. Гэта жывёлы вагой да 40 кілаграмаў з вострымі зубамі, якія не любяць, калі іх чапаюць або на іх шляху аказваецца перашкода.
Па словах Пупіньша, пры сустрэчы з бабром трэба ўцякаць:
«Бабёр досыць хутка бегае, але на доўгай дыстанцыі вашыя шанцы ўзрастаюць. Прычым ўцякаць лепш пятляючы, спрабуючы заблытаць яго і схавацца з вачэй. Ускараскацца на дрэва — таксама добры варыянт. Бабёр не есць людзей. Яго ежа — дрэвы. Так што ў яго не спрацуе ў галаве сцэнар «перагрызці ствол дрэва, на якім сядзіць чалавек, каб здабыць чалавека».
Каментары