Premjer-ministr Turcyi Achmiet Davutahłu abviaściŭ ab rašeńni syści ŭ adstaŭku sa svajoj pasady i pakinuć post lidara kirujučaj Partyi spraviadlivaści i raźvićcia.
Pa słovach Davutahłu, jon vyrašyŭ nie vyłučać svaju kandydaturu na čarhovych vybarach kiraŭnika partyi, jakija projduć na jaje źjeździe 22 maja. Takoje rašeńnie premjer pryniaŭ pa vynikach pieramovaŭ z upłyvovymi členami vykankama partyi.
U vyniku, pa słovach Davutahłu, jon pryjšoŭ da vysnovy, što dla adzinstva partyi i stabilnaści ŭ joj budzie karysnaja źmiena lidara. Premjer adznačyŭ, što ličyć paśpiachovaj svaju pracu na čale ŭrada, jaki pryjšoŭ na ciažki pieryjad u žyćci krainy.
Raniej paviedamlałasia, što pamiž Davutahłu i prezidentam krainy Redžepam Taipam Erdahanam užo daŭno isnujuć roznahałośsi, niahledziačy na toje, što apošni paśla abrańnia prezidentam sam abraŭ Davutahłu svaim pierajemnikam na pasadzie lidara Partyi spraviadlivaści i raźvićcia.
Adnak paźniej Davutahłu staŭ vykazvać niazhodu z palitykaj Erdahana, jaki vyrašyŭ pamianiać parłamienckuju sistemu kiravańnia krainaj na prezidenckuju, heta značyć maksimalna pašyryć prezydenckija paŭnamoctvy, a premjer-ministru vyłučyć druharadnuju rolu.
U suviazi z hetym u tureckaj presie źjaviłasia infarmacyja pra mahčymuju zamienu Davutahłu na inšaha čałavieka. Čakałasia, što heta adbudziecca na pazačarhovym źjeździe Partyi spraviadlivaści i raźvićcia ŭ kancy maja.
Kamientary