Nie daje čytačam vybaru: Facebook abvinavacili ŭ manipulacyi infarmacyjaj
Sacyjalnaja sietka Facebook trapiła pad škvał krytyki paśla paviedamleńniaŭ pra toje, što jana staranna adfiltroŭvaje infarmacyju kansiervatyŭnych ŚMI na karyść libieralnych.
Pra heta paviedamlaje RBK sa spasyłkaj na The New York Times.
U ZŠA «libieralnymi» nazyvajuć vydańni levaj častki palityčnaha śpiektru, prychilnikaŭ, u bolšaści svajoj, Demakratyčnaj partyi, u adroźnieńnie ad prychilnikaŭ tradycyjnaha kapitalizmu respublikancaŭ.
U paniadziełak, 9 maja, sajt Gizmodo sa spasyłkaj na byłych supracoŭnikaŭ Facebook, jaikia kuryravali naviny, paviedamiŭ, što administracyja sacsietki rehularna abmiažoŭvaje raspaŭsiudžvańnie navin, jakija ŭjaŭlajuć cikavaść dla kansiervatyŭnaha čytača. U toj ža čas naviny na karyść libieralnaha łahiera štučna prasoŭvalisia, navat kali jany nie byli ŭ dastatkovaj stupieni papularnyja, śćviardžali surazmoŭcy Gizmodo.
«Vyklikaje krajniuju zakłapočanaść infarmacyja, što takaja siła vykarystoŭvajecca dla taho, kab zamoŭčvać punkt hledžańnia i materyjały, jakija nie adpaviadajuć niejkamu paradku dnia», — zajavili ŭ Nacyjanalnym kamitecie Respublikanskaj partyi ZŠA. Hałoŭny redaktar navinavaha vydańnia Breitbart News Alaksandr Marłoŭ paviedamiŭ The New York Times, što źviestki Gizmodo «paćviardžajuć daŭnija padazreńni kansiervataraŭ».
«Aproč sadziejničańnia pieraśledu pravych, heta klučavy napamin pra niebiaśpieku kantrolu za kantentam, jakaja zychodzić ad Kramianiovaj daliny», — adreahavaŭ były žurnalist brytanskaj haziety The Guardian Hlen Hrynvald. Ab niebiaśpiecy manipulavańnia infarmacyjaj z dapamohaj sacyjalnych sietak zajavili jašče niekalki vydańniaŭ.
U svaju čarhu pres-sakratar Facebook zajaviła, što sacyjalnaja sietka kirujecca strohimi pryncypami «ŭ metach zabieśpiačeńnia ŭzhodnienaści i niejtralitetu» i ŭličvaje usie punkty hledžańnia. «My prymajem abvinavačvańni ŭ praduziataści vielmi surjozna», — havorycca ŭ zajavie kampanii. «Facebook źjaŭlajecca płatformaj dla ludziej i pohladaŭ usich abłaściej palityčnaha śpiektru», — padkreślili ŭ kampanii.
Jak piša NYT, Facebook maje 222 młn aktyŭnych karystalnikaŭ štomiesiac u Złučanych Štatach i Kanadzie. Pry hetym apytańnie, praviedzienaje ŭ 2015 hodzie Pew Research Center i Knight Foundation, pakazała, što 63% karystalnikaŭ Facebook razhladajuć servis jak krynicu navin.
Kamientary