Usio, što Vy chacieli viedać pra zvarot, adnak bajalisia spytać

Novy feljeton z błohu Lolika Uškina.

Spadabałasia ŭ zvarocie kiraŭnika da parlamentu papularyzacyja dziaržaŭnaj palityki praz asacyjacyi z anatomijaj čałavieka: dziaržava — heta stvoł arhanizmu i h.d. Adrazu ŭzhadaŭ słavuty skietč ź filmu Vudzi Alena — «Usio, što Vy chacieli viedać pra seks, i bajalisia spytać». Tam, naadvarot, anatomiju čałavieka ilustravali praz hramadzkija pracesy. Moj ścipły plahijat.

Adździeł «Mozh»

Pieršy: Nu, što, kaleha, pačynajem. (Bieručy słuchaŭku). Adździeł «Vočy», pakažecie zalu.

Spuskajecca peryskop.

Druhi: Što bačycie, kaleha?

Pieršy: Baču pałatnikaŭ. Słuchaj, nu i... tvary!

Druhi: Blin, ty ž sam ich padbiraŭ. Ładna ŭžo, davaj pačynać. (Bieručy słuchaŭku). Tak, dajcie adździeł «Jazyk». «Jazyčniki», pačynajem pramaŭlać! Što-što? Vy što tam, znoŭ zranku pad muchaj! Pramovu, vašu… Što? «Vočy» nie dasłali syhnału? Zaraz vyrašym. I hladzicie, kab usio było pad kantrolem. Nijakich słovaŭ pa-za tekstam: nijakich habrejaŭ, travy i h.d. (Źviartajučysia da kalehi). Słuchaj, jany ŭ «Jazyku» tam užo, vidać, zranku taho (pstrykaje siabie palcam pa horle).

Pieršy (bieručy słuchaŭku): «Vočy», kali žadajecie kab z vami nie pierarvali kantraktu, aperatyŭna čytajem tekst i pieradajom syhnał u adździeł «Jazyk». (Źviartajučysia da kalehi). Što tam pałatniki?

Druhi (hledziačy ŭ peryskop): Niešta rassłabiŭsia naš deputacki korpus. Treba harknuć na pradstaŭnikoŭ narodu.

Pieršy (u słuchaŭku): Adździeł «Jazyk»! Terminova dajcie ŭ tekst pramovy frazu «kantrol budzie žastačajšy». Pahladzi, jakaja reakcyja?

Druhi (hledziačy ŭ peryskop): Byccam znoŭ stali napružanymi. Narmalna.

Pieršy: Nu, praces pajšoŭ. Ciapier hałoŭnaje kab tolki nie…

Raptam ścieny pakoju pačynajuć treścisia. Zvonku čujecca syhnał tryvohi. Na stale zvonić telefonny aparat.

Pieršy (bieručy słuchaŭku): Što takoje tam u vas, adździeł «Psychika»? Što? U sumleńni ŭspłyło słova «Kazulin» i pieradałosia ŭ adździeł «Jazyk». Adkul? My ž niadaŭna rabili začystku sumleńnia. Kaleha, nia stojcie — zajmiciesia «Jazykom».

Druhi (ŭ słuchaŭku): Alo, «Jazyk»? Što — moŭny aparat całkam vyjšaŭ z-pad kantrolu? Niasie ŭsiakuju łuchtu. Chucieńka vyrubajcie jaho k čortavaj maciery. Ja skazaŭ — vyrubaj rubilnik, šelma! Voś tak. Dobra, dajcie adździeł «Serca». «Serca», usio narmalna? Sprabujcie supakoicca.

Pieršy: Byccam arhanizm stabilizavaŭsia.

Druhi: Daju syhnał «Vačam» — praciahvać čytać tekst...

Pieršy: Dajcie adździeł «Vušy». Słuchajcie, što tam naš «Jazyk» paśpieŭ nałamać? Błychi… niama ničoha śviatoha… Nu, heta jašče ništo sabie. Pracujem dalej.

Druhi (hledziačy ŭ peryskop): Byccam i čas zakančvać. Deputaty amal śpiać.

Pieršy: Akiej, adnak nie zabudźsia hyrknuć na ich i, moža, niešta jašče padkiń elektaratu.

Druhi (u słuchaŭku): Adździeł «Jazyk»! Terminova dadajcie ŭ tekst pramovy frazu «kantrol budzie žastačajšy, i zarobak budzie 700 baksaŭ».

Pieršy (vycirajučy łob): F-fu, byccam skončyli. Ale na budučyniu tre budzie kapitalna zaniacca sumleńniem.

Druhi (dastajučy plašku vinčyka): Ładna, davaj pakul trochi rassłabimsia. Ja zaraz dam adpaviednuju kamandu vertykali. (Bieručy słuchaŭku). Dajcie adździeły «Ruki» i «Nohi». Tak, chłopcy, biarom klušku i haniajem šajbu da viečara. “Mozh” prośba niejki čas nie turbavać. I hladziecie mnie — kantrol budzie žastačajšy.

• 0
• 0
• 0
• 0
• 0
• 0
• 0
• 0