Hałoŭny futurołah z Google Rej Kurcvejł u niadaŭnim intervju časopisu Playboy nazvaŭ datu, kali miedycynskija technałohii dazvolać amal nieabmiežavana padaŭžać žyćcio.
Rej Kurcvejł viadomy svaimi pracami ŭ halinie futurałohii. Jon źjaŭlajecca prychilnikam kancepcyi, zhodna ź jakoj u adzin momant technałahičny prahres stanie nastolki chutkim, što čałaviečy rozum budzie nie ŭ stanie zrazumieć jaho. Materyjalny dastatak ludziam buduć zabiaśpiečvać inavacyjnyja mašyny, a prahresiŭnaja miedycyna dapamoža dasiahnuć nieŭmiručaści. Kurcvejł zapeŭnivaje, što vyšejpieraličanaje čakaje nas užo da 2045 hoda.
Pa słovach navukoŭca, mienavita da 2045 hoda niebijałahičny rozum dasiahnie ŭzroŭniu, paraŭnalnaha z sukupnaj pradukcyjnaściu ŭsiaho čałaviectva. Praŭda, kab zrazumieć łohiku vyznačeńnia daty pieramohi mašyny nad čałaviekam, nieabchodna aznajomicca z pracami Kurcvejła, pakolki ŭ intervju jon vyrašyŭ nie pahłyblacca ŭ svaje daśledavańni.
Cikava, što značnyja źmieny ŭ žyćci sučasnaha čałavieka futorołoh prahnazuje ŭžo da 2020 hoda. Navukoviec zapeŭnivaje, što da hetaha hoda čałaviectvu stanie dastupna vykarystańnie nanarobataŭ, jakija voźmuć na siabie funkcyi našaj imunnaj sistemy.
Kurcvejł upeŭnieny, što mikraskapičnyja pryłady možna budzie ŭkaraniać niepasredna ŭ kryvaciok, dzie jany zmohuć vykonvać funkcyi žyvych T-kletak. Navukoviec adznačyŭ, što nanarobaty zmohuć spraŭlacca z baraćboj suprać infiekcyj i rakavych puchlin značna bolš efiektyŭna za žyvyja kletki. Futurołah nie admaŭlaje, što zaprahramavanyja dla procidziejańnia ŭsim mahčymym patahienam pryłady možna budzie abnaŭlać z dapamohaj śpiecyjalna dastupnych u internecie prahram.
Niahledziačy na pierakanaŭčaść dovadaŭ futurołaha, jaho pohlady padzialajuć daloka nie ŭsie. Zdavałasia b, jany całkam łahičnyja. Adnak nie varta zabyvać pra mahčymuju niełahičnaść čałaviečaha raźvićcia. Tym bolš mnohija terminy nievierahodnych dla sučasnaj śviadomaści čałavieka pradkazańniaŭ Kurcvejła akazvajucca zanadta aptymistyčnymi. Na dumku futurołaha, u 2014 hodzie pavinny byli źjavicca supierkampjutar sa štučnym intelektam bolš mahutnym, čym čałaviečy mozh, i virtualnaja realnaść, zdolnaja achapić usie našy orhany pačućciaŭ paralelna. Takim čynam, ludzi, jakija žyvuć u 2016 hodzie, mohuć adznačyć, što nie ŭsie prahnozy Reja Kurcvejła nastolki chutka stanoviacca realnaściu.
Kamientary