U redakcyju «NN» pryjšoŭ list ad čytača, u jakim raspaviadajecca pra budaŭnictva parafijalnaha doma na Vajskovych mohiłkach «u suviazi z rearhanizacyjaj». U bukletach adznačana, što ŭsie aharodžy, kryžy i pastamienty, jakija nie ŭjaŭlajuć histaryčnuju i estetyčnuju kaštoŭnaść, buduć prybranyja.
Na miescy mohiłak płanujecca «azdaravić raślinnaść», «pavialičyć terytoryju bruku», a vakoł chrama pabudavać parafijalny dom. Na samich mohiłkach administracyja paviesiła šyldy z papiaredžańniem. Maŭlaŭ, kali za nastupnyja dva hady mahiły nie buduć uparadkavanyja, nadmahilnyja zbudavańni mohuć być demantavanyja i ŭtylizavanyja.
Tak vyhladaje chram ciapier.
Siarhiej Tur, namieśnik dyrektara pa ideałahičnaj pracy «Śpieckambinata KBA», zapeŭnivaje, što nivodnaja mahiła nie budzie paškodžanaja ci źniesienaja.
Na aharodžy i kryžach visiać papiery z papiaredžvajučaj infarmacyjaj.
«Usiaho było znojdziena bolš za 2300 zakinutych pachavańniaŭ. Siońnia na Vajskovych mohiłkach pachavana bolš za 7000 čałaviek. U žniŭni 2017 hoda my budziem dobraŭparadkoŭvać zakinutyja mohiłki, kali nie znojdziem svajakoŭ. Ale nivodnaje pachavańnie nie budzie źniesienaje, budzie prosta dobraŭparadkavańnie mohiłak. U vypadku, kali pamiatnik, kryž ci inšyja nadmahilnyja zbudavańni nielha budzie adnavić, na jaho miescy budzie pastaŭleny adzin z varyjantaŭ identyfikacyjnych znakaŭ. Heta budzie ci kryž, ci tumba, ci pastamient, pakul heta znachodzicca na zaćviardžeńni ŭ Minharvykankamie».
Pradstaŭnik «Śpieckambinata KBA» adznačyŭ, što budaŭnictvam parafijalnaha doma i dobraŭparadkavańniem terytoryi zajmajecca niepasredna chram, ale biez dazvołu Minharvykankama i Ministerstva kultury jany ničoha nie zmohuć budavać.
Sprava pavinien stajać parafijalny dom, choć mahiły raźmieščanyja ŭprytyk da chramu.
U Alaksandra-Nieŭskaha chrama svajo bačańnie situacyi. Tam śćviardžajuć, što byŭ raspłanavany prajekt, pavodle jakoha nad mohiłkami buduć stajać arki, a chram takim čynam zmoža zrabić na druhim paviersie pakoi, dzie śviatary zmohuć pieraapranucca i adpačyć.
«Pahladzicie, kolki tut nieŭparadkavanych mahiłaŭ kala chrama! My ž prapanavali zrabić prosta miemaryjalnyja plity, a pobač prakłaści darohu, kab ludziam było dzie raźviarnucca. Heta takija znakavyja mohiłki, a ludzi nie mohuć, prabačcie, u tualet schadzić, bo jaho niama, nie mohuć zajechać mašyny, kali pryvoziać cieły dla adpiavańnia, i baciuškam niama dzie pieraapranucca», — kaža Mikałaj Łukjančyk, hałoŭny architektar pa restaŭracyi i dobraŭparadkavańni častki mohiłak u achoŭnaj zonie chramu. Pa jaho słovach, Minharvykankam padtrymaŭ ideju z arkami nad mohiłkami, ale nie zmoh uchvalić, spasyłajučysia na zakanadaŭstva. «A my nie źbiralisia pieranosić ci zrujnavać mohiłki, my chočam ich dobraŭparadkavać i dać ludziam bolš prastory», — dadaje jon.
