Pašyrany pieralik rabot pa ramoncie padjezdaŭ, jakija vykonvajucca za srodki žycharoŭ, paviedamili ŭ HA «Minskaja haradskaja žyllovaja haspadarka». Ciapier za nieprystojnyja nadpisy ŭ lifcie buduć płacić žychary.
Fota: Jaŭhien Jerčak, TUT.BY
Pavodle instrukcyi ab paradku płanavańnia, praviadzieńnia i finansavańnia biahučaha ramontu žyllovaha fondu, zaćvierdžanaj pastanovaj Ministerstva ŽKH RB ad 30 sakavika 2016 hoda № 5, nazvany pieralik dapoŭnieny novym, 10-m punktam: «Afarboŭka dźviarej šachty i kabiny lifta, kupe kabiny lifta».
Jak patłumačyła namieśnik načalnika vytvorčaha adździeła MHŽH Taćciana Zmačynskaja, hetyja raboty buduć pravodzicca pa miery nieabchodnaści z ulikam techničnaha i estetyčnaha stanu kanstruktyŭnych elemientaŭ lifta.
Naprykład, pry vyjaŭleńni nadpisaŭ i malunkaŭ, inšych prajaŭ vandalizmu. U takich vypadkach rabotniki ŽEU składajuć defiektny akt z ukazańniem vidaŭ i abjomaŭ rabot, kaštarys zychodziačy z faktyčnych vydatkaŭ. Ahulnaja suma raźmiarkoŭvajecca pamiž ułaśnikami i najmalnikami kvater i ŭklučajecca ŭ žyroŭku dla nastupnaj apłaty.
Schod ci pakvaternaje apytańnie pravodziacca tady, kali žychary sami inicyjujuć praviadzieńnie ramontu padjezda, u tym liku lifta. Kab prystupić da jaho, nieabchodnaja zhoda bolšaści haspadaroŭ kvater, pry hetym sumy da apłaty vystaviać usim.
U asnoŭnym rašeńnie pra abnaŭleńnie miescaŭ ahulnaha karystańnia prymajecca pa vynikach viasnovych i vosieńskich ahladaŭ žyllovaha fondu ŭ płanavym paradku niezaležna ad pazicyi žycharoŭ, adznačyli ŭ MHŽH.
U nazvanaj instrukcyi paznačanyja kryteryi, pa jakich vyznačajecca nieabchodnaść praviadzieńnia ramontu. Heta, u pryvatnaści, najaŭnaść defiektaŭ azdobnaha pakryćcia (skoły, vyboiny, raskoliny, adsłajeńnia farby i ablicoŭki, tynkavaha płasta, nadpisy i malunki nieprystojnaha charaktaru) i elemientaŭ inžyniernych sistem.
