Adukacyjnyja prajekty «Biełaruski kalehijum» i «Latučy ŭniviersitet» vypuścili antałohiju biełaruskaj fiłasofskaj dumki «Kod prysutnaści» za 2000—2015 hady. Prezientacyja knihi adbyłasia ŭviečary 18 maja ŭ staličnaj halerei «Ŭ».
Pieršaja kniha takoha rodu źjaviłasia ŭ 2003 hodzie pad nazvaj «Antałohija sučasnaha biełaruskaha myśleńnia» pad redakcyjaj fiłosafaŭ Alesia Ancipienki i Valancina Akudoviča.
Jak adznačyŭ na prezientacyi kulturołah i krytyk Maksim Žbankoŭ, kali stvarałasia pieršaja antałohija, staviłasia pytańnie, «ci možna kazać pra niejkuju asablivuju biełaruskuju intelektualnuju supolnaść, ci jość u pryncypie samastojnyja farmaty biełaruskaha myśleńnia». «Ciapier ža, u druhoj antałohii, stajać pytańni ab kodach vyražeńnia, stratehii myśleńnia, kanfliktach, kanceptualnych i ideałahičnych razychodžańniach pamiž imi. Słovam, pra toje, što z bolšaha paznačaje narmalnuju situacyju intelektualnaha pracesu», — skazaŭ Žbankoŭ.
Składalniki «Koda prysutnaści» pasprabavali «pieradać sens kali nie epochi, to, pa mienšaj miery, piatnaccacihadovaha pieryjadu, jaki prajšoŭ», adznačyła kiraŭnik adukacyjnaha prajekta «Latučy ŭniviersitet» Taćciana Vadałažskaja. Pavodle jaje słoŭ, teksty, jakija ŭvajšli ŭ druhuju antałohiju, raskryvajuć niekalki asablivaściaŭ biełaruskaj fiłasofskaj dumki pačatku tysiačahodździa.
«Pačatak 2000-ch — heta pieryjad palemikaŭ, — skazała jana. — Pieršyja teksty ŭ knizie — heta manifiesty, indyvidualnyja pazicyi, jany palemičnyja i dyskusijnyja. Jany šmat u čym pieraklikajucca i adsyłajuć adzin da adnaho. Akramia taho, Biełaruś u hety pieryjad stanovicca punktam adliku, kantekstam dla razvažańnia bolš šyrokaha koła myślaroŭ, tamu ŭ knizie šmat tekstaŭ prafiesijnych fiłosafaŭ, jakija źviartajucca da Biełarusi, adšturchvajucca ad jaje, šukajuć jaje… Biełaruskaje fiłasofskaje myśleńnie ŭ hety čas praciahvaje stvarać ułasny suśviet i śvietaŭsprymańnie».
U knihu ŭvajšło bolš za dvaccać tekstaŭ biełaruskich fiłosafaŭ, sacyjołahaŭ, kulturołahaŭ, palitołahaŭ, litarataraŭ, krytykaŭ, linhvistaŭ, falkłarystaŭ. Aŭtary asensoŭvajuć pracesy, jakija adbyvalisia ŭ kulturnym i palityčnym žyćci krainy na praciahu pieršych 15 hadoŭ novaha tysiačahodździa, razvažajuć ab raźvićci hramadstva i indyvida, nacyi i idei, razdumvajuć pra los rehijonu ŭ hieapalityčnym kantekście.
Ciapier čytajuć
Staŭ hierojem Mahiloŭskaha ŭniviera, źbiraŭ falkłor, pracavaŭ na biełarusizacyju sadkoŭ — raskazvajem pra Jaŭhiena Bojku, asudžanaha za salidarnaść z palitviaźniami66
Kamientary