U subotu avijakampanija admianiła kala 30% rejsaŭ. Adnak pradstaŭniki Air France kažuć, što harady, dzie prachodziać matčy čempijanatu, zastanucca pryjarytetnymi napramkami ŭ hetyja dni.
Prafsajuz lotčykaŭ damahajecca, kab ŭrad admianiŭ novaje pracoŭnaje zakanadaŭstva, pavodle jakoha budzie značna lahčej jak najmać, tak i zvalniać rabotnikaŭ.
U Francyi adnačasova strajkujuć niekalki prafsajuzaŭ:
śmieciary nie buduć vyvozić śmiećcie ŭ Paryžy da nastupnaj sierady, a čyhunačnyja kamunikacyi tolki što adnoŭleny paśla dzieviacidzionnaj zabastoŭki. Nie tak daŭno pa ŭsioj krainie adčuvaŭsia brak haručaha, kali ŭ vyniku ŭsieahulnaha strajku pratestoŭcy błakavali padjezdy da bienzazapravačnych stancyj.
Prezident Fransua Aland źviarnuŭsia da prafsajuzaŭ z prośbaj nie pieraškadžać praviadzieńniu Jeŭra-2016.
«Ja zaklikaju da pačućcia adkaznaści kožnaha z vas, bo naša kraina abaviazana vykanać svaje abaviazacielstvy, i jana ich vykanaje, zrabiŭšy ŭsio mahčymaje», — zajaviŭ Ałand.
Adnak prafsajuz lotčykam Spaf užo zajaviŭ, što strajk projdzie z suboty pa aŭtorak.
Razam z tym vykanaŭčy dyrektar Air France Frederyk Hažy paabiacaŭ skaracić niazručnaści ŭ tym, što tyčycca rejsaŭ u harady, dzie prachodziać matčy čempijanatu.
«Zrazumieła, my nie kiniem čempijanat Jeŭra», - skazaŭ Hažy, dadaŭšy, što strajk abyjdziecca avijakampanii u piać miljonaŭ jeŭra ŭ dzień.
Jak čakajecca, paradku siami miljonaŭ čałaviek naviedajuć 10 francuzskich haradoŭ, kab pahladzieć futboł.