MUS pra pajezdku biełaruskich dziaciej i nieanacysta Milčakova: Zaniatkaŭ nie pravodziŭ, ź dziećmi nie mieŭ adnosin
Biełaruskija dzieci na majskija śviaty ŭdzielničali ŭ vielikodnych mižnarodnych moładzievych vajenna-patryjatyčnych zborach u Maskoŭskaj vobłaści. Dadzienaje mierapryjemstva nasiła charaktar adpačynku i «nie moža razhladacca jak viarboŭka, navučańnie, finansavańnie albo vykarystańnie najmitaŭ dla ŭdziełu va ŭzbrojenych kanfliktach abo ŭ vajennych dziejańniach». Tak adkazała biełaruskaje MUS na pietycyju z patrabavańniem pravieryć, čym zajmalisia biełaruskija dzieci ŭ rasijskim vajenna-patryjatyčnym łahiery.
U dakumiencie, padpisanym načalnikam Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj M. Karpiankovym havorycca, što zbory, jakija prachodzili ŭ Maskvie i Maskoŭskaj vobłaści, byli pryśviečany 75-hodździu pačatku Vialikaj Ajčynnaj Vajny i 100-hodździu Brusiłaŭskaha praryvu. Arhanizataram pajezdki biełaruskich dziaciej stała hramadzianka Rasijskaj Fiederacyi, jakaja maje vid na žycharstva ŭ Respublicy Biełaruś, žycharka Viciebska Taćciana Haŭrylina.
Dziejničała Haŭrylina jak pryvatnaja asoba, «imknučysia raznastaić volny čas i kruhahlad» dziaciej. Pavodle źviestak MUS, prapanovaj skarystalisia piaciora z 15 zaprošanych školnikaŭ.
Padčas pajezdki dzieci pabyvali na repietycyi paradu Pieramohi na Krasnaj płoščy ŭ Maskvie, z ekskursijaj prajechalisia pa puškinskich miescach u rasijskaj stalicy, a taksama śpiavali pieśni la vohnišča, udzielničali ŭ roznych konkursach, hulali ŭ łaziertah.
«Mierapryjemstvy, u jakich pryniali ŭdzieł biełaruskija dzieci, pa svaim źmieście i skiravanaści nie mieli na mecie pryciahnieńnia hramadzian Respubliki Biełaruś dla ich niepasrednaha ŭdziełu ŭ jakich-niebudź kankretnych vajennych kanfliktach, nasili zabaŭlalny charaktar i zasnoŭvalisia na śviatkavańni ahulnapryznanych histaryčnych faktaŭ vajennaha minułaha narodaŭ Rasii i Biełarusi», — ukazvajuć u MUS, a tamu «dziejnaść arhanizataraŭ praviedzienaha mierapryjemstva nie moža razhladacca jak viarboŭka, navučańnie, finansavańnie albo vykarystańnie najomnikaŭ dla ŭdziełu va ŭzbrojenych kanfliktach abo ŭ vajennych dziejańniach».
Što tyčycca prysutnaści na hetych zborach rasijskaha nieanacysta Alaksieja Milčakova, to, jak paviedamlaje MUS «ukazany hramadzianin, sa słoŭ apytanych, zaniatkaŭ nie pravodziŭ i ź biełaruskimi dziećmi nie mieŭ kantaktaŭ».
Dakładnych źviestak ab supraćpraŭnych pavodzinach Milčakova ŭ Biełarusi ci za jaje miežami niama. Vysnovy pra toje, što jon prytrymlivajecca ekstremisckich pohladaŭ, zroblenyja na padstavie vyvučeńnia jaho asabistych staronak u sacyjalnych sietkach. «Dadzienaja krynica nie moža być adniesiena da efiektyŭnych srodkaŭ raspaŭsiudžvańnia supraćpraŭnych idej i zaklikaŭ z pryčyny ich abmiežavanaści ŭździejańnia na šyrokija płasty hramadstva i adsutnaści biezumoŭnaha aŭtarytetu ich aŭtara», — infarmuje MUS.
Ciapier čytajuć
Adkul u Biełaruś jedzie bolš za ŭsio hastarbajtaraŭ? Top-20 krain — i Pakistana tut pakul niama1
Kamientary