Mask paabiacaŭ nadalej mienš pracavać u administracyi Trampa i bolš — u svaich kampanijach
Iłan Mask u aŭtorak zajaviŭ, što pačynajučy z maja rezka skaracić kolkaść času, jakoje jon pryśviačaje pracy ŭ administracyi Trampa, u Departamiencie efiektyŭnaści ŭrada (DOGE), i u vialikaj stupieni vierniecca da kiraŭnictva svaimi kampanijami, piša Bi-bi-si.
Najbolšaja z kampanij Maska, Tesla, u aŭtorak apublikavała vyniki za pieršy kvartał hetaha hoda, ź jakich vynikaje, što jaje čysty prybytak abrynuŭsia za hod na 71%.
«Vialikaja častka pracy — farmiravańnie kamandy DOGE i ŭzajemadziejańnie z uradam u navzdzieńni finansavaha paradku ŭ domie — užo ŭ asnoŭnym zroblena», — cytuje ahienctva Reuter słovy Maska, skazanyja padčas telefonnaj kanfierencyi z analitykami.
U toj ža čas Mask nie źbirajecca całkam sychodzić z DOGE: jon skazaŭ, što źbirajecca pryśviačać jamu 40% svajho času.
«Udzieł Maska ŭ tak zvanym Departamiencie efiektyŭnaści ŭrada, dzie jon kiruje sprobami skaracić štat fiederalnych dziaržaŭnych słužboŭcaŭ, staŭ palityčnym hramavodam, — nahadvaje Reuters. — Jon spravakavaŭ pastajannyja pratesty i vandalizm u dačynieńni da sałonaŭ Tesla».
Pavodle spravazdačy Tesla za pieršy kvartał 2025 hoda, čysty prybytak kampanii za hetyja try miesiacy skłaŭ 409 młn dołaraŭ, što na 71% mienš, čym u pieršym kvartale 2024 hoda. Vyručka — 19.3 młrd dalaraŭ — źniziłasia ŭ paraŭnańni z pačatkam minułaha hoda na 20%.
U studzieni—sakaviku 2025-ha Tesla pradała amal 337 tysiač svaich elektramabilaŭ, i heta jaje najhoršy kvartalny vynik bolš čym za dva hady.
Pry hetym, jak adznačajuć analityki, amal 600 młn dalaraŭ Tesla zarabiła, pradajučy liški kvotaŭ pa «zialonych» aŭtamabilach, i biez hetaha zarobku jana apynułasia b u minusie. To bok, kampanija Maska zastajecca prybytkovaj u tym liku dziakujučy baraćbie sa źmianieńniem klimatu, suprać jakoj vystupaje Donald Tramp, jakoha horača padtrymlivaje Iłan Mask.
Akcyi Tesla, niahledziačy na taki spravazdačny pieršy kvartał, u aŭtorak prykmietna vyraśli ŭ canie — jak tłumačać analityki, inviestaraŭ natchnili abiacańni Maska bolš zajmacca svaimi kampanijami, a taksama pačać vytvorčaść adnosna tannaj novaj madeli elektramabila ŭžo ŭ červieni.
Ciapier čytajuć
Što zdaryłasia ź Mikitam Miełkazioravym, jaki raptoŭna pamior nočču?35
Kamientary