NISEPD: 42,3% biełarusaŭ ličać Łukašenku hałoŭnym vinavatym u kryzisie

Było apytana 1.512 čałaviek, pamyłka reprezientatyŭnaści, zhodna sa źviestkami NISEPD, nie pieravyšaje 3%.

42,3% respandentaŭ ličać prezidenta krainy hałoŭnym vinavatym u ciapierašnim kryzisie. 35,6% apytanych uskłali adkaznaść za najaŭnuju situacyju na ŭrad, 12,8% — na parłamient. Adkazvajučy na anałahičnaje pytańnie ŭ sakaviku, bolšaja častka (48,3%) apytanych vinavacili ŭ kryzisie ŭrad, 47% — prezidenta, 22,7% — deputataŭ.

Pavodle infarmacyi sacyjołahaŭ, bolšaść respandentaŭ «krytyčna pastavilisia da asnoŭnych pałažeńniaŭ viasnovaha pasłańnia Alaksandra Łukašenki da biełaruskaha naroda i Nacyjanalnaha schodu». Tak, z zajavaj kiraŭnika dziaržavy ab tym, što ŭłada ŭžo pryniała «ŭsie nieabchodnyja rašeńni dla raźvićcia ekanomiki» i ich «prosta treba realizavać», nie zhodnyja 55,8% apytanych, padtrymali Łukašenku 31,1%.

Bolš za pałovu respandentaŭ taksama nie pahadzilisia z prezidentam u tym, što «ŭ asnovie dziaržpalityki lažyć kłopat pra čałavieka, pra pavyšeńnie dabrabytu i jakaść žyćcia biełarusaŭ», što «dziaržava achoŭvaje pravy, ułasnaść i hodnaść ŭsich pradprymalnikaŭ, jakija sumlenna viaduć svaju spravu», što «dziaržorhany ŭ stanie stvarać štohod 50 tysiač novych pracoŭnych miescaŭ» i što «ŭ suśvietnym rejtynhu pa dostupie da miedycynskich pasłuh Biełaruś zajmaje pieršaje miesca». Prykładna tracina apytanych padtrymali hetyja śćviardžeńni.

Bolš za 45% respandentaŭ ličać, što Łukašenka «zaležyć ad karumpavanych čynoŭnikaŭ» abo navat «tym ci inšym čynam zacikaŭleny» ŭ karupcyi ŭ krainie. Zvyš 25% apytanych pierakananyja, što jamu «naŭrad ci ŭdasca damahčysia istotnych pośpiechaŭ, tamu što karupcyja ŭ Biełarusi nievykaranialnaja». Krychu mienš tych, chto ličyć, što «Łukašenka zdoleje damahčysia pośpiechu ŭ baraćbie z karupcyjaj, kali praviadzie rašučuju čystku šerahaŭ čynoŭnikaŭ najvyšejšaha ranhu i zrobić bolš žorstkimi pakarańni za takija złačynstvy».

Jak śćviardžajuć daśledčyki, biełarusy ŭsio bolš krytyčna ŭsprymajuć źmieny sacyjalnaj struktury hramadstva, što adbyvajucca pad uździejańniem dziaržaŭnaj palityki, kali «rolu pradstaŭnikoŭ ułady ŭ joj pastajanna pavyšajecca, a kulturnaj i navukovaj elity i prostaha naroda źnižajecca».

Ź mierkavańniem ab tym, što siońnia Łukašenka ŭ pieršuju čarhu abapirajecca na «prezidenckuju viertykal», pahadzilisia 54,4% respandentaŭ (dziesiać hadoŭ tamu takich było 37%). Za dziesiać hadoŭ, na dumku ludziej, rola čynoŭnikaŭ jak apory prezidenta źniziłasia z 32,1 da 20,5%. Mienš stała i tych, chto bačyć hałoŭnuju aporu Łukašenki ŭ piensijanierach (21,8% apytanych u červieni hetaha hoda suprać 41,4% dziesiać hadoŭ tamu), žycharach vioski (11,5% suprać 30,2%), prostych ludziach (8,2% suprać 34,2%), u kulturnaj i navukovaj elicie krainy (4,4% suprać 8,3%).

Z tym, što Biełaruś — heta «tolki častkova maja dziaržava, i jana niedastatkova abaraniaje intaresy takich, jak ja», pahadzilisia 47,1% apytanych biełarusaŭ. Mienš za 30% padtrymali mierkavańnie ab tym, što «Biełaruś — maja dziaržava, i jana achoŭvaje maje intaresy». 15,2% zhodnyja z tym, što «heta nie maja dziaržava, jana nie achoŭvaje maje intaresy, i ja nie daviaraju joj».

Kolkaść tych, chto ličyć, što praktyčna ŭsia ŭłada ŭ krainie zasiarodžanaja ŭ rukach Łukašenki i heta idzie na karyść Biełarusi, źniziłasia da 31,3% u paraŭnańni ź vieraśniem 2009 hoda (tady takoha mierkavańnia prytrymlivalisia 44,4% respandentaŭ). Kolkaść tych, chto pierakanany, što kancentracyja ŭłady ŭ rukach prezidenta «nie daje krainie ničoha dobraha», za hety ž čas vyrasła z 36 da 55,5%.

• 0
• 0
• 0
• 0
• 0
• 0
• 0
• 0