Staršynia arhkamiteta dla stvareńnia Biełaruskaj sacyjał-demakratyčnaj partyi (Narodnaja Hramada) Mikoła Statkievič bačyć dźvie alternatyvy što da parłamienckaj kampanii: albo ihnaravańnie, albo akcyi pratestu.
- Pradstaŭnik CVK Mikałaj Łazavik zajaviŭ, što vašu inicyjatyŭnuju hrupu zarehistrujuć tolki ŭ vypadku źniaćcia z vas sudzimaści. Jak vy prakamientujecie hetuju zajavu?
- Heta całkam čakana. Mianie ździŭlaje inšaje: čamu akcyju Narodnaj Hramady niekatoryja naohuł uspryniali jak majo «vyłučeńnie ŭ deputaty»?
Usurjoz «varycca» va ŭsim hetym farsie — takoje mnie navat u strašnym śnie nie moža pryśnicca. My padali zajavu na rehistracyju inicyjatyŭnaj hrupy dla taho, kab pakazać hramadstvu i zachodnim palitykam, jakija žadajuć «dyjałohu» z Łukašenkam, što ŭ krainie pradaŭžajecca pieraśled byłych palitviaźniaŭ.
Sudzimaść z nas nie zdymajuć, i my navat nie možam paŭdzielničać u vybarčym farsie, jaki byŭ naładžany ŭładami dziela zachodnich kredytaŭ. Pra heta my i chočam nahadać, arhanizavaŭšy takuju akcyju ŭ suviazi z «vybarami».
Jość 1% imaviernaści, što ŭłada zarehistruje maju inicyjatyŭnuju hrupu. Ja adrazu adkryta zajaŭlaju: tady my praviadziem ciaham niekalkich tydniaŭ akcyi ŭ centry ŭ Miensku — pad prykryćciom kampanii dla zboru podpisaŭ. Meta našaj sproby rehistracyi — kab ludziej nie štrafavali za hetyja akcyi. Ja pra heta zajaŭlaju hučna i adkryta, i chaj ułada prymaje moj vyklik i vybiraje: rehistravać mianie ci nie.
Kali inicyjatyŭnuju hrupu nie zarehistrujuć, to heta daść dla Narodnaj Hramady nahodu vykazać svajo staŭleńnie da hetych «vybaraŭ»: kali režym navat dziela zachodnich hrošaj nie idzie na imitacyju «libieralizmu», to ja i maje kalehi zajaŭlajem pra niaŭdzieł u hetym farsie. I my budziem zaklikać da niaŭdziełu ŭ «vybarach» našych partnioraŭ u apazicyi i Biełaruskim nacyjanalnym kanhresie.
- Vy kažacie ciapier pra niaŭdzieł abo pra bajkot «vybaraŭ»?
- Bajkatavać toje, čaho niama, składana. Možna bajkatavać sapraŭdnyja vybary, dzie realna padličvajuć prychod vybarščykaŭ. U farsie ž možna tolki nie ŭdzielničać.
Tym ža, chto ŭvažaje siabie za častku demakratyčnaj apazicyi, ja chaču nahadać ab pryncypach salidarnaści. Kali my ŭsie pryznajem, što «vybaraŭ» niama, davajcie pakažam, što možam być salidarnymi ŭ nieprymańni hetaha farsu.
