 |
Fest projdzie ŭ try dni z 8 pa 10 žniŭnia ŭ Lvovie. Arhanizatary kažuć, što vybar miesca praviadzieńnia zusim nievypadkovy — sam horad vielmi pryhožy i dabracca da jaho ź Miensku pa kišeni navat studentu‑biudžetniku. Adzin z arhanizataraŭ lvoŭskaha festu — Alaksiej Łukaševič ź niefarmalnaj inicyjatyvy «StudFarmat» peŭny, što słohan Be Free! — adlustroŭvaje hałoŭnuju kaštoŭnaść festyvalu — jaho adkrytaść i niefarmalnaść:
«My čakajem, što na našyja kancerty pryjeduć tysiačy maładych ludziej z usioj Biełarusi, a lvoŭskaja publika, turysty z Polščy i inšych Eŭrapiejskich krainaŭ, zmohuć paraŭnać uzrovień prafesijanalizmu zorak svaich krainaŭ i Biełarusi. Ale hałoŭnaje — festyval stanie mažlivaściu prajavić siabie, daviedacca bolš adzin pra adnaho i pravieści ŭik‑end u prastory svabody».
Letaś fest prachodziŭ u Łucku pad słohanam «Prava być svabodnym». U im udzielničali 9 hurtoŭ ź Biełarusi i Ŭkrainy, fest sabraŭ bolš za 5 tysiač hledačoŭ.
A sioleta ŭ Lvovie zaplananavany vystup užo 25 hurtoŭ ź Biełarusi, Ukrainy, Polščy. Fest projdzie adrazu na dźviuch placoŭkach: u Parku imia Bahdana Chmialnickaha vystupiać rok‑hurty, a na Centralnym rynku Lvova projduć pakazy rycarskich klubaŭ i vystupiać kamandy, što hrajuć folk i siaredniaviečnuju muzyku. Svaju zhodu ŭžo dali viadomyja biełaruskija vykanaŭcy, u tym liku «Krama», ULIS, Neuro Dubel, zygimont VAZA, WZ‑Orkiestra, Pomidor/OFF, Zet, «Stary Olsa». U chedłajnery z polskaha boku zaprošany hurt T‑Love, z ukrainskaha — «Tartak». Z hurtom N.R.M. arhanizataram damovicca nie atrymałasia.
Adzin z arhanizataraŭ festu Vital Supranovič kaža:
«Paśla letašniaha festyvalu ŭ Łucku nas litaralna zakidali prośbami praciahnuć fest naleta. Užo ciapier my majem niekalki dziasiatkaŭ zajavak ad hurtoŭ Polščy, Ukrainy, Serbii i Francyi».
