Hienieralny padradčyk budaŭnictva BiełAES: Nijakaha incydentu z reaktaram nie było, prosta ścierłasia farba
U «Atambudeksparcie» — u hieneralnaha padradčyka budoŭli «Biełaruskaj AES» — zajaŭlajuć, što nijakaha nadzvyčajnaha zdareńnia ci navat surjoznaha incydentu na biełaruskaj stancyi padčas budavańnia nie adbyłosia.
Pra heta «Radyjo Svaboda» zajaviła kiraŭnik upraŭleńnia kamunikacyj Nina Dziemiancova.
Pavodle jaje słovaŭ, na «Biełaruskaj AES» była «zvyčajnaja štatnaja sytuacyja, jak heta byvaje na budoŭli».
«My ž užo napisali (heta było navat u aficyjnym liście, pieradadzienym biełaruskamu boku), što ścierłasia farba pry praviadzieńni takiełažnych prac pa pierasoŭvańni korpusu reaktara z transpartnaha na mantažny łažement. Heta budoŭla. Heta štatnaja zvyčajnaja sytuacyja. Nu nie byvaje, kab na budoŭli čahości tam nie było. Ja dumaju, što heta možna nazvać štatnaj sytuacyjaj. Heta nie NZ, nie incydent», — zajaviła jana, padkreśliŭšy, što «korpus reaktara znachodzicca za miežami reaktarnaha adździaleńnia».
Nina Dziemiancova adznačyła, što paćviardžeńniem taho, što ničoha surjoznaha nie adbyłosia, źjaŭlajecca toje, što «Atambudekspart» pracuje ŭ zvyčajnym režymie.
«Paviercie, mnie, ja siadžu ŭ horadzie-hieroi Maskva. Ŭsio kiraŭnictva tut. Usio absalutna spakojna, praŭda. Vy ž cudoŭna razumiejecie, kali niešta adbyvajecca, usio adrazu niasucca na złom hałavy. Kali b niešta zdaryłasia, to heta była b panika, usie pavinny byli b być tam. A ŭ nas usio nam miescach: nie ŭ Biełarusi, a ŭ Maskvie i ŭ Nižnim Noŭharadzie. U nas usio ŭ pracoŭnym režymie, iduć narady, sustrečy — idzie zvyčajnaja praca», — zapeŭniła kiraŭnik upraŭleńnia kamunikacyj.
Nina Dziemiancova zajaviła, što ŭ «Atambudeksparcie» ničoha nia ŭtojvajuć ad hramadzkaści.
«U nas adrazu sabraŭsia štab, my ŭsie aperatyŭna dałažyli, napisali, dali ŭ presu. Pracuje kamisija MAHATE. Nam važna, kab usio było narmalna. My ničoha nie baimsia. Ab vynikach pracy misii MAHATE my naturalna prainfarmujem ŚMI, hramadzkaść, sumiežnyja dziaržavy. My, hieneralny padradčyk, na jakim lažyć adkaznaść za biaśpieku ŭsich rabot, i my zacikaŭleny bolš čym chto-niebudź u adsutnaści lubych sumnieńniaŭ u nadziejnaści abstalavańnia i ŭsich rabot».
Na dumku kiraŭnika ŭpraŭleńnia kamunikacyi, tema zdareńnia na BiełAES štučna raździmajecca niezyčliŭcami.
«Heta ŭsio tolki apazycyjnyja prajektu aktyvisty. My manitorym hetyja publikacyi kožnuju ranicu i adzin pryhažej za inšaha zahałoŭki daje. Heta ž palityka», — kaža jana.
25 lipienia ŭ ŚMI źjavilisia paviedamleńni, što 10 lipienia padčas vyprabavalnaha trenirovačnaha ŭstaloŭvańnia korpusu reaktara 330-tonny ahrehat sarvaŭsia i ŭpaŭ z vyšyni ad 2 da 4 metraŭ. Paviedamlałasia taksama, što miesca nadzvyčajnaha zdareńnia ačeplenaje i znachodzicca pad pastajannaj i ŭzmocnienaj achovaj.
Paśla praciahłaha maŭčańnia Ministerstva enerhietyki Biełarusi pryznała:
«Na spravie, pavodle infarmacyi hieneralnaha padradčyka AT «Atambudekspart», niaštatnaja sytuacyja zdaryłasia na placoŭcy zachoŭvańnia korpusu reaktara pry praviadzieńni takielažnych pracaŭ pa jaho pierasoŭvańni ŭ haryzantalnaj płoskaści».
U Minenerha zapeŭnili, što ciapier analiz hetaj sytuacyi praciahvajecca:
«Paśla ŭsiebakovaha vyvučeńnia biełaruskimi admysłoŭcami pradstaŭlenaj AT «Atambudekspart» infarmacyi budzie prymacca adpaviednaje rašeńnie. Pry hetym biełaruski bok budzie, u pieršuju čarhu, kiravacca nieabchodnaściu biezumoŭnaha harantavańnia biaśpieki stancyi, jakaja budujecca».
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim10
Kamientary