9 žniŭnia baćki Uładzimira Kondrusia, novaha fihuranta spravy ab masavych biesparadkach, upieršyniu za dva miesiacy aryštu naviedali syna ŭ minskim SIZA-1.
Stan zdaroŭja 39-hadovaha Uładzimira Kondrusia, jaki ciapier znachodzicca ŭ sančastcy «Vaładarki», jaho baćki aceńvajuć jak krytyčny. Jon vytrymaŭ tolki piać chvilinaŭ pieršaha dazvolenaha spatkańnia z baćkami. Pra heta Pravaabarončamu centru «Viasna» paviedamiŭ jahony baćka Uładzimir Raścisłavavič.
«My ŭ šoku. Syn — napałovu trup. U pakoj dla pieramovaŭ jaho vynieśli na nasiłkach. Jaho chapiła na piać chvilinaŭ hutarki. Jon źniasileny. Kazaŭ jon vielmi nievyrazna. Hladziš na jaho z boku — zdajecca, što jon jak u tumanie, drenna razumieje. Vočy paŭpustyja», — raspavioŭ jon sa stracham u hołasie.
Jak paviedamlałasia, u SIZA Uładzimir Kondruś trymaŭ doŭhaterminovuju haładoŭku na znak pratestu suprać svajho źniavoleńnia, što i stała pryčynaj rezkaha paharšeńnia jaho stanu zdaroŭja. Pavodle baćki, siońnia, niahledziačy na svaju ćviorduju pazicyju, jon paprasiŭ pra dapamohu.
«Syn paprasiŭ nas damahčysia, kab jamu zrabili zond. Sprava ŭ tym, što ŭ jaho jazva i z hetaj pryčyny jaho nie ŭziali ŭ vojska. Zaraz jon charkaje kryvioju. Vidavočna, jazva abvastryłasia. A ŭ sančastcy nijakaj dapamohi jamu nie akazvajuć, tak i kažuć: «My takoj dapamohi nie akazvajem». Jon prosić abiazbolvalnaje — nie dajuć. Strašna havaryć pra ŭsio heta… Maci siońnia ŭ SIZA ślozna prasiła pieravieści jaho ŭ narmalny špital. Našamu synu nieabchodnaja terminovaja dapamoha», — praciahnuŭ Uładzimir Raścisłavavič.
Nahadajem, što žychar pasiołka Rudziensk Uładzimir Kondruś 1977 hoda naradžeńnia byŭ uziaty pad vartu 14 červienia ŭ miežach papiaredniaha rasśledavańnia za jaho mierkavany ŭdzieł u masavych biesparadkach kala Doma Urada padčas vybaraŭ prezidenta ŭ 2010 hodzie. Jon abvinavačvajecca pa artykule 293 Kryminalnaha kodeksa «Masavyja biesparadki», pa jakim u 2011 hodzie było asudžana 49 čałaviek, mnohija z pazbaŭleńniem voli na roznyja terminy. Na čas śledstva jon utrymlivajecca ŭ SIZA №1 h. Minska.
Kamientary