Rasijskija ŚMI raspaviadajuć pra płany zatrymanych dyviersantaŭ «zabić turyzm» u Krymie

Fota nnm.me.

Zatrymanyja ŭ Krymie dyviersanty płanavali arhanizavać u roznych kropkach paŭvostrava sieryju nievialikich pa mahutnaści vybuchaŭ, jakija b pasiejali siarod ich paniku. Takim čynam jany płanavali «zabić turyzm» u Krymie. Pra heta piša ŭ čaćvier hazieta «Kommiersant'» sa spasyłkaj na krynicy, znajomyja sa śviedčańniami zatrymanych.

Pavodle ich śviedčańniaŭ, ździajśniać terakty ŭ dačynieńni da kiraŭnikoŭ Kryma abo na pramysłovych abjektach jany nie źbiralisia.

Mierkavałasia arhanizavać u roznych kropkach kurorta sieryju nievialikich pa mahutnaści vybuchaŭ, jakija nie pavinny byli pryvieści da hibieli ludziej, a vyklikać paniku siarod adpačyvalnikaŭ i, u rešcie rešt, jak vykazaŭsia surazmoŭca vydańnia, «zabić turyzm».

Z pakazańniaŭ zatrymanych taksama vynikaje, što vybuchoŭku pavinna była dastavić druhaja hrupa, jakaja išła pa inšym maršrucie. Jana musiła pakinuć vybuchoŭku i inšaje ŭzbrajeńnie ŭ śpiecyjalna padrychtavanym schoviščy.

Sa słoŭ zatrymanych, jany supracoŭničali z hałoŭnym upraŭleńniem raźviedki Minabarony Ukrainy, dzie prajšli dyviersijnuju padrychtoŭku. Taksama, pavodle ich słoŭ, jany ŭvachodzili ŭ adnu ź niekalkich hrup, nakiravanych ŭkrainskaj vyviedkaj u Krym.

Krynicy taksama raspaviali, što bolšaść zatrymanych apynulisia žycharami Kryma, u niekatorych pry sabie byli rasijskija pašparty. Ich sapraŭdnaść jašče treba budzie ŭstanavić, udakładnili surazmoŭcy haziety.

Raniej krynicy «Rośsijskoj haziety» paviedamili, što zatrymanyja ŭ Krymie dyviersanty płanavali padarvać trasu Simfieropal — Jałta padčas pieramiaščeńnia kartežaŭ kiraŭnictva respubliki i fiederalnych uładaŭ.

10 žniŭnia FSB Rasii paviedamiła pra likvidacyju ŭkrainskaj dyviersijnaj hrupy i papiaredžańnie teraktaŭ u Krymie. U zajavie śpiecsłužby havaryłasia, što hrupa dyviersantaŭ była znojdziena ŭ horadzie Armiansku ŭ noč z 6 na 7 žniŭnia. Padčas pierastrełki zahinuŭ supracoŭnik FSB i vajskoviec Minabarony.

Kijeŭ usie abvinavačvańni ŭ svoj adras admaŭlaje. U Minabarony i ŭ Hałoŭnym upraŭleńni vyviedki Minabarony Ukrainy nazvali paviedamleńni ab ŭkrainskaj dyviersijnaj hrupie «pravakacyjaj» i «fejkam». MZS Ukrainy nazvaŭ padziei ŭ Krymie «pravakacyjaj Kramla».

Prezident Rasii Uładzimir Pucin, kamientujučy paviedamleńni FSB, abvinavaciŭ ukrainskija ŭłady ŭ pierachodzie da teroru zamiest vyrašeńnia kanfliktnych pytańniaŭ za stałom pieramoŭ. Jon nazvaŭ sproby ažyćciavić terakty ŭ Krymie «durnoj i biessensoŭnaj akcyjaj».

Ukrainski prezident Piotr Parašenka nazvaŭ abvinavačvańni ŭ teraryźmie «fantazijami».

• 0
• 0
• 0
• 0
• 0
• 0
• 0
• 0