Brat Panova ličyć, što taho vykrali i vyvieźli ŭ Krym

Ukrainca Jaŭhiena Panova vykrali ŭ Zaparožskaj vobłaści i vyvieźli ŭ Krym, ličyć jaho brat Ihar Kacielaniec.

«Ja da hetaha času nie mahu pavieryć u realnaść padziej. Majho brata vykrali. Nie isnuje nijakaha inšaha varyjantu, jak jon moh apynucca ŭ Krymie», — napisaŭ jon u Facebook.

Paśla Kacielaniec raspavioŭ žurnalistam u Kijevie: «Moj brat na minułym tydni płanavaŭ razam sa svaim siabram z Enierhadara pajechać u zaparožski haradski špital na reabilitacyjnyja mierapryjemstvy. Jany niekalki dzion heta płanavali i ŭ apošni momantu jaho siabar skazaŭ, što ŭ jaho niejkija spravy paŭstali i jon nie moža pajechać «.

Jaŭhien Panoŭ, pa słovach rodnaha brata, vyrašyŭ nie jechać adzin u vajenny špital, zatoje płanavaŭ sustrecca z kim-niebudź ź siabroŭ z vobłaści — «abo ź niejkaha susiedniaha siała, abo z susiedniaha horada».

Kacielaniec adznačyŭ, što brat — atošnik, z 2014-ha pa 2015 hod vajavaŭ na Danbasie, a jak viarnuŭsia z ATA — zajmaŭsia vałanciorskaj dziejnaściu, tamu ŭ jaho źjaviłasia značna bolš siabroŭ, znajomych, novych ludziej, tamu što ludzi masava dapamahali ŭschodu.

«Da kaho mienavita jon pajechaŭ — ja nie viedaju, ale jon źjechaŭ u subotu ranicaj na svajoj mašynie, uziaŭ tolki maleńkuju sumku, u jakuju pakłaŭ ručnik, bializnu, zubnuju ščotku — usio», — skazaŭ mužčyna.

«Na videa jaho zatrymańnia, jakoje pakazvajuć rasiejskija telekanały, jak jaho viaduć pa adździaleńni milicyi, jon idzie ŭ zvyčajnaj futbołcy, zvyčajnych štanach-trenikach. Ja paznaju hetu futbołku, u joj jon moh pajechać niedzie ŭ haraž ramantavać mašynu ci na daču na šašłyki. tamu ja dumaju, što jon prosta chacieŭ sustrecca z kim-niebudź ź siabroŭ, na jakija šašłyki — sprava vychadnoha dnia, nie bolš», — zajaviŭ Kacielaniec.

Jon udakładniŭ, što brat «braŭ da hetaha za svoj košt (vychadny) u paniadziełak — kab pajechać u vajenny špital».

«Pakolki sa špitalem nie skłałasia, jon papiaredziŭ žonku: «Ja pajedu, ale ja viarnusia ŭ niadzielu, moža, u paniadziełak». Apošni raz žonka razmaŭlała ź im u subotu ŭviečary, jon patelefanavaŭ skazać, što ŭsio akiej, ja zaŭtra budu», — adznačyŭ brat Panova.

«U niadzielu jon užo nie vychodziŭ na suviaź… Čamu adrazu nie padumali ab drennym? Tamu što ŭ jaho stary Lenovo telefon, jaki ŭ apošni čas časta razradžajecca — navat kali jon jeździć pa horadzie, jaho ledź chapała na paŭdnia… Padumali, što jon prosta dzieści za horadam, u jaho sieŭ telefon… Da taho ž mnie pozna ŭviečary ŭ subotu pryjšła sms-ka «vaš abanient znoŭ na suviazi». Ja pieratelefanavaŭ, ale jon znoŭ pa-za zonaj», — rastłumačyŭ jon

«Čakali jaho ŭ niadzielu — niama, čakali ŭ paniadziełak — niama, i pačynajem niejkija pošuki… Jon nie źjaviŭsia ŭ aŭtorak — my ŭžo aktyŭna stali šukać. U sieradu my daviedajemsia z naviny na «Ukrainskaj praŭdzie», što ŭ Krymie zatrymany Jaŭhien Panoŭ, 1977 hoda… Kali pakazali videa, ja pierakanaŭsia, što heta jon», — skazaŭ Kacielaniec.

Jon zajaviŭ taksama: «Ja źviartaŭsia pa dapamohu da vysokapastaŭlenych asob, mnie abiacali, što daviedajucca, pieratelefanujuć — ale da hetaha času mnie nichto nie pieratelefanavaŭ».

Kacielaniec adznačyŭ, što ŭ brata, jak u atošnika, była forma, biercy, ryštunak — heta i ciapier znachodzicca na bałkonie ŭ jaho doma.

Raniej Fiederalnaja słužba biaśpieki Rasiei abvinavaciła Ministerstva abarony Ukrainy ŭ padrychtoŭcy teraktaŭ u anieksavanym Krymie.

Pa śćviardžeńni FSB RF, «adnym z arhanizataraŭ źjaŭlajecca Panoŭ Jaŭhien Alaksandravič, 1977 hoda naradžeńnia, žychar Zaparožskaj vobłaści, supracoŭnik HUR MA Ukrainy». Panova zatrymali.

Pradstaŭniki ŭkrainskaj ŭłady abvinavačańni admaŭlajuć i padazrajuć rasiejskija ŭłady ŭ pravakacyjach z metaj apraŭdańnia svaich dziejańniaŭ.

• 0
• 0
• 0
• 0
• 0
• 0
• 0
• 0