Papularnaja brytanskaja hazieta The Telegraph dniami apublikavała artykuł pad nazvaj «Pjanstva, zubry i babulki. 25 faktaŭ, jakija vy nie viedali pra Biełaruś». Možna vinavacić aŭtaraŭ u praduziataści i nieabjektyŭnaści, a možna prosta z uśmieškaj pačytać pra toje, jaki našu krainu i nas samich ubačyli łondanskija žurnalisty. Tak, biełarusy nieabyjakavyja da vypiŭki, zatoje heta jany prydumali Viber i World of Tanks, a ich biblijateka nahadvaje niešta z «Zornych vojnaŭ».
1. Jany lubiać vypić
The Telegraph spasyłajecca na niesuciašalny dla Biełarusi dakład Suśvietnaj arhanizacyi achovy zdaroŭja. «U siarednim hramadzianie spažyvajuć u ekvivalencie 17,5 ł čystaha śpirtu ŭ hod. Heta raŭnasilna 179 butelkam vina ŭ hod ci amal piaci čarkam harełki ŭ dzień», — adznačaje vydańnie.
2. I pakuryć
Pavodle inšaha dakładu SAAZ, Biełaruś znachodzicca na druhim miescy ŭ rejtynhu krain, jakija najbolš kurać u Jeŭropie, prapuściŭšy napierad tolki Čarnahoryju. «U daktaroŭ u Biełarusi pavinna być vielmi šmat pracy», — reziumuje žurnalist Olivier Śmit.
Fota Siarhieja Hudzilina
3. Čatyry abjekty suśvietnaj spadčyny
«Pra jakija vy ničoha nie čuli», — piša The Telegraph, zhadvajučy zamki ŭ Miry i Niaśvižy.
4. Trahičnaja najnoŭšaja historyja
Demanstrujučy ŭmieńnie karystacca «Vikipiedyjaj», žurnalisty z The Telegraph paviedamlajuć, što Biełaruś paniesła vielizarnyja ludskija straty ŭ hady Druhoj suśvietnaj vajny, zdoleŭšy adnavić davajennuju kolkaść nasielnictva tolki da 1971 hoda. A ŭ 1986-m krainu nakryŭ Čarnobyl.
5. «Horad, pabudavany Stalinym»
Byvałyja vandroŭcy apisvajuć Biełaruś jak «adbitak» SSSR. «Majo pieršaje ŭražańnie pra Minsk — heta horad, pabudavany Stalinym, — piša žurnalist Sancha Hua. — Minsk byŭ razburany padčas Druhoj suśvietnaj vajny, i Saviety pabudavali na ruinach uzorny horad, kab prademanstravać svaju žyćcieŭstojlivaść».
Fota Siarhieja Hudzilina
6. Babuli savieckaj zahartoŭki
«Kali vy chočacie ŭspomnić, jak heta — adčuvać siabie niby škadlivaje maleńkaje dzicia, to dosyć učynić maleńki promach», — praciahvajuć supracoŭniki The Telegraph, pryvodziačy historyju jašče adnaho žurnalista: «Pry ŭvachodzie ŭ muziej vyjaŭlenčych mastactvaŭ ja mieŭ nieaściarožnaść nie źniać palito. Čyjaści ciažkaja ruka apuściłasia na majo plačo. Ruka naležała nie palicejskamu, a babuli savieckaj zahartoŭki. «Kožny abaviazany źniać palito», — skazała jana, spapialiŭšy mianie pozirkam. «Ale mnie choładna», — adkazaŭ ja niaśmieła na łamanaj rasiejskaj. «Pahladzicie na hetych dziaciej», — pakazała jana na hrupu školnikaŭ u kašulach. Chutčej by ja apynuŭsia na viešałcy ŭnutry palito, čym jana prapuściła b mianie dalej».
7. Tut možna ŭbačyć zubroŭ
Simvał Biełarusi — biełaviežski zubr — taksama trapiŭ u top-25 faktaŭ pra našu krainu.
Fota Alaksieja Bunieviča
8. Minsk — najhoršy dla žyćcia horad Jeŭropy?
Vydańnie kančatkova dabivaje imidž Minska ŭ vačach brytancaŭ, publikujučy spasyłku na dakład kansałtynhavaj kampanii Mercer, abjektyŭnaść jakoha vyklikaje surjoznyja pytańni. Daśledčyki apuścili biełaruskuju stalicu na 190-je miesca ŭ rejtynhu haradoŭ śvietu, ranžyravanych pavodle jakaści žyćcia.
9. Jana raŭninnaja
Alpinistam tut rabić niama čaho, zaklučaje The Telegraph. Samaja vysokaja hara — Dziaržynskaja — maje vyšyniu ŭsiaho 345 mietraŭ.
10. Jany vynajšli Viber
Raspracoŭki biełarusaŭ u halinie IT nie zastalisia pa-za ŭvahaj brytanskich žurnalistaŭ.
11. Nacyjanalnaja biblijateka vyhladaje jak niešta z «Zornych vojnaŭ»
«I źmiaščaje za 8 miljonaŭ knih, — piša aŭtar artykuła. — Dniom 236-futavy budynak ciažka nie zaŭvažyć, a ŭviečary jon źlivajecca ź ciemraj. Kab paźbiehnuć takoj niepryjemnaści, dyzajniery ŭstalavali śviatłodyjodnuju padśvietku hraniaŭ ałmaza, dziakujučy čamu z nadychodam ciemry budynak stanovicca samym niejmaviernym dyska-šaram u Jeŭropie».
12. U kožnym horadzie jość vulica Lenina
«Na vulicy Lenina, 27 u Minsku jość navat handlovy centr z savieckaj tematykaj, jaki byŭ adkryty letaś», — piša hazieta, majučy na ŭvazie HC «Leninhrad». Na samaj spravie zvyčajny meblevy handlovy centr sa sprečnaj nazvaj. Abo, ubačyŭšy madelny šerah kanap, brytancy padumali, što apynulisia ŭ muziei SSSR?
13. Jany padaryli nam «Spartaka»
Halivudski akcior Kirk Duhłas, jaki syhraŭ hałoŭnuju rolu ŭ filmie «Spartak» (1960 hoda), maje biełaruskija karani. Jaho baćki emihravali ŭ ZŠA z horada Čavusy Mahiloŭskaj vobłaści. «Skarlet Jochansan i Charysan Ford taksama mohuć prasačyć svoj radavod da byłoj savieckaj respubliki», — adznačaje vydańnie.
14. I Marka Šahała
Akramia pieraličanych vyšej akcioraŭ i mastaka Marka Šahała ŭ śpis vybitnych biełarusaŭ pa viersii The Telegraph trapili himnastka Volha Korbut, tenisistka Viktoryja Azaranka, viełasipiedyst Vasil Kiryjenka, a taksama adzin z zasnavalnikaŭ halivudskaj kinastudyi Metro-Goldwyn-Mayer Łuis Majer.
15. Biełaruś — aziornaja
Fakt biassprečny, tut brytancy ničoha nie prychłusili.
Brasłaŭskija aziory. Fota Viktara Małyščyca
16. Ale nie maje vychadu da mora
«Vady šmat, ale salonaj niama naohuł, — aŭtary artykuła praciahvajuć uzbahačać čytačoŭ encykłapiedyčnymi viedami. — Biełaruś źjaŭlajecca adnoj z 45 krain śvietu, jakija nie miažujuć z morami i akijanami».
17. Tam byvaje horača i choładna
«Tempieratura ŭ Minsku apuskajecca da -25 hradusaŭ i nižej u zimovy pieryjad, ale moža dasiahać +35 hradusaŭ letam».
Fota Siarhieja Hudzilina
18. Nie lotaje Ryanair
Akramia Minska, u Biełarusi jość jašče niekalki bujnych haradoŭ, ale ni adnaho ź ich niama ŭ maršrutach Ryanair, škadujuć brytancy.
19. Jany lubiać bulbu
«Bulbianyja bliny — draniki — nacyjanalnaja strava biełarusaŭ».
20. Chakiej u pašanie
«Amal hetak ža, jak i futboł».
21. Biełaruś padaryła śvietu 5 nobieleŭskich łaŭreataŭ
Biełaruś moža hanarycca nie tolki Śviatłanaj Aleksijevič. Niekalki łaŭreataŭ hetaj najprestyžnaj mižnarodnaj premii majuć biełaruskija karani. U ich liku Žares Ałfioraŭ, Šymon Pieres, Mienachiem Biehin, Sajman Kuźniec.
22. I World of Tanks
«Papularnaja anłajn-hulnia była raspracavana biełaruska-kiprskaj kampanijaj Wargaming».
23. Jana zialonaja
«Kala 43% terytoryi Biełarusi pakryta lasami. Heta bolš, čym praktyčna ŭ luboj krainie Jeŭropy. A minski bataničny sad płoščaj 100 hiektaraŭ — adzin z najbujniejšych u śviecie».
Fota Siarhieja Hudzilina
24. Tolki adno zołata ŭ Rya
«Zdymajem kapialušy pierad batutystam Uładzisłavam Hančarovym».
25. Jany pjuć biarozavy sok
«Biarozavy sok da hetaha času vykarystoŭvajecca ŭ Biełarusi dla lačeńnia raznastajnych chvarob, u tym liku lohačnych zachvorvańniaŭ i padahry», — zapeŭnivaje The Telegraph.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)