Sioleta ŭ Biełarusi budzie sabrany vialiki ŭradžaj bulby, što paciahnie źnižeńnie jaho koštu, paviedamiŭ 6 vieraśnia na pres-kanfierencyi ŭ Minsku namieśnik hienieralnaha dyrektara Navukova-praktyčnaha centra NANB pa bulbavodstvie i płodaaharodnictvu Vadzim Machańko.
«Bulby, navat niahledziačy na toje što źnizili pasadkavyja płoščy, nie prosta šmat, a vielmi šmat. Rynak na heta mamientalna adreahavaŭ, i siońnia maksimalnaja cana — 20 kapiejek z PDV za kiłahram. A heta blizka da sabiekoštu. Heta značyć rentabielnaść vielmi rezka padaje praz toje, što na našym asnoŭnym rynku zbytu ŭ Rasii pašyryli pasadkavyja płoščy. Tam taksama bulby šmat, i treba być hatovymi da taho, što rekordnych koštaŭ nie budzie», — adznačyŭ navukoviec.
Jon paviedamiŭ, što ŭžo ŭbrana kala 11% płoščaŭ bulby pry ŭradžajnaści na 3—5 ton z hiektara — bolš, čym letaś. Rekardsmien pa ŭradžajnaści — Tałačynski rajon Viciebskaj vobłaści — 41—42 tony z hiektara.
«Z bulbaj my viarnulisia na Sachalin ŭ Rasii. Tam było zasiejana 40 ha płoščaŭ, i čakajecca niakiepski ŭradžaj. Takim čynam, bulba biełaruskaj sielekcyi vyroščvajecca ad Bresta da samych uschodnich miežaŭ Rasiei», — skazaŭ Machańko.
Jon adznačyŭ, što ŭ krainie pastupova ŭkaraniajucca novyja technałohii apracoŭki i zachoŭvańnia praduktaŭ bulbapierapracoŭki, u tym liku ŭ vakuumnaj upakoŭcy. «Pakul heta davoli doraha, ale kali skłaści plusy i minusy, heta niadrenna dla bližejšaj budučyni», — ličyć vučony.
Na pytańnie, kudy Biełaruś pradaść vysoki ŭradžaj bulby, Machańko adkazaŭ: «Jakasnuju bulbu zaŭsiody jość kamu pradać. Kali vyrablać abiaźličanuju, niepryvabnuju, niasmačnuju bulbu, jana nikomu nie patrebnaja. Tamu my zaŭsiody nastojvajem, kab bulba vyrablałasia zychodziačy ź jaje metavaha pryznačeńnia — stałovaja abo na prampierapracoŭku. Nadyšoŭ čas, kali nam treba vyrablać bolš bulby na kruchmał, tym bolš što ŭ suviazi z sankcyjami ŭ RF tam kruchmału stała krychu mienš i jany sami zadumvajucca pra budaŭnictva kruchmalnych zavodaŭ. Nam treba paśpiašacca, kab nie spaźnicca. A bulbu pradadzim. Prybytak budzie krychu mienšy, ale biez hrošaj nie zastaniemsia».
Kamientary