Biełaruski žurnalist Alaksandr Vasiukovič pieramoh u konkursie FOTODOC z prajektam «Fota na pamiać»
Prajekt Alaksandra «Fota na pamiać» zaniaŭ pieršaje miesca ŭ naminacyi «Kanflikt».
Prajekt Alaksandra Vasiukoviča «Fota na pamiać» — heta fotazdymki ludziej, jakija zahinuli na Danbasie padčas uzbrojenaha kanfliktu pamiž Rasijaj i Ukrainaj.
«Hetyja fotazdymki byli zroblenyja na pamiać, kali ja pracavaŭ u minułym hodzie na ŭschodzie Ukrainy. Mnohija sałdaty prasili mianie zrabić fotazdymak na pamiać i pa mahčymaści dasłać im albo ichnim svajakam, žonkam, siabram», - havorycca ŭ anatacyi da fotaprajekta.
Druhoje miesca ŭ hetaj ža naminacyi zaniaŭ prajekt «Vajna va Ukrainie» rasijskaha žurnalista Siarhieja Łojki.
U hetym prajekcie pradstaŭlenyja fotazdymki, zroblenyja padčas abłohi Danieckaha aeraporta i na pieradavoj u Piaskach pobač ź im u vieraśni i kastryčniku 2014 hoda.
Centr dakumientalnaj fatahrafii FOTODOC pry Sacharaŭskim centry pravodzić konkurs fatahrafii «Priamoj vzhlad». U konkursie biaruć udzieł pracy, jakija adlustroŭvajuć prablemy ŭzajemaadnosinaŭ čałavieka z hramadstvam i dziaržavaj, a taksama šlachi vyrašeńnia hetych prablem.
U konkursie try naminacyi:
«Prablema» — prablemy i supiarečnaści, jakija ŭźnikajuć u hramadstvie pamiž čałaviekam i socyumam, hramadskimi instytutami i dziaržavaj);
«Kanflikt» — najbolš vostry sposab vyrašeńnia supiarečnaściaŭ, jakija ŭźnikajuć u pracesie sacyjalnaha ŭzajemadziejańnia. Prajaŭlajecca jak supraćdziejańnie ŭdzielnikaŭ i zvyčajna supravadžajecca niehatyŭnymi emocyjami, jakija vychodziać za miežy praviłaŭ i normaŭ.
«Kampramis» — vyrašeńnie kanfliktnaj situacyi šlacham dyjałohu, sacyjalnych źmienaŭ abo reformaŭ.
***
Alaksandr Vasiukovič — fatohraf-fryłansier, jaki žyvie ŭ Minsku. Naradziŭsia ŭ 1985 hodzie. Karjeru fotažurnalista pačaŭ u 2010 hodzie. U 2012 hodzie atrymaŭ Hran pry «Pres-fota Biełarusi» i pieršaje miesca ŭ nacyjanalnym konkursie multymiedyja ŭ tym ža hodzie. Supracoŭničaje ź biełaruskimi i zamiežnymi ŚMI, pracuje nad piersanalnymi prajektami. Siabra HA «Biełaruskaja asacyjacyjažurnalistaŭ».
Kamientary