Svajo videaŭvasableńnie atrymała pieśnia «Chadziła hałota» z alboma «Lekavyja travy». Klip źniali prychilniki kamandy, muzyki ŭpadabali videa i pryznali za aficyjnaje.
Klip raspaviadaje trahičnuju historyju kachańnia ŭ styli fentezi ź niečakanym finałam, jakaja razhortvajecca ŭ začaravanym lesie niedaloka ad Babrujska dy inšych tajamničych miaścinach. Aŭtarkaj scenaru i režyserkaj klipa vystupiła vykładčyca kursaŭ «Mova nanova» ŭ Babrujsku Alesia Łacinskaja. Hałoŭnyja roli vykanali vijalančelistka hurta Vodar Hanna Łukašyk, historykŹmicier Šapialevič dy krajaznaŭca Jaŭhien Lisoŭski, jaki, darečy, nieadnarazova zdymaŭsia ŭ vajenna-histaryčnych filmach. Što tyčycca siužetu, dyk aŭtary imknulisia nie prosta kiravacca tekstam, ale napisali svaju historyju.
«Chapiła zahadkavych vobrazaŭ i mistyčnaj melodyi, kab imhnienna skłałasia historyja, choć pamiž nami było šmat dyskusijaŭ nakont tekstu, bo kožny razumieŭ jaho pa-svojmu, i nie adzin viečar abmiarkoŭvali, chto što rabiŭ, chto takaja Hałota, chto byŭ ziać, a chto star z baradoj», - tłumačyć režyserka. «Jość pieśni, jakija pačynaješ razumieć paśla druhoha-piataha prasłuchoŭvańnia, a hetaja streliła adrazu ŭ serca. Dla mianie jana — symbal bahataha Kosmasu biełarusaŭ. Maju na ŭvazie i tych aŭtaraŭ ź minułaha, jakija prydumali pieśniu, i sučasnych, jakija dali joj novaje žyćcio», - pryznajecca aperatar Siaržuk Łacinski.
Praca nad videa ciahnułasia niekalki miesiacaŭ, i, jak pryznajucca jaho stvaralniki, ciažej za ŭsio było złučyć źniaty materyjał u celny tvor. Asablivaja ŭvaha nadavałasia kaściumam i dekaracyjam, jakija stvaryła dyzajnerka Darja Šapialevič. Prykładam, tolki vializnaja maska boha — ažno metr daŭžynioj — vyrablałasia dva tydni. Urešcie rešt, vynikam zastalisia zadavolenyja i zdymačnaja hrupa, i muzyki, jakija ŭ praces zdymak anijak nia ŭmiešvalisia.
«Choć videa stvaryli amatary, usio ž my nia ličym jaho fan-artam, ale samastojnym tvoram mastactva, jaki źjaviŭsia jak praciah našaj muzyčnaj idei», - kaža lider hurta Re1ikt bubnač Alaksandr Dziemidzienka.
U asnovu kampazycyi «Chadziła hałota» pakładzienaja zapisanaja ad nośbitaŭ u Lelčyckim rajonie biełaruskaja narodnaja pieśnia. Hety trek z alboma «Lekavyja travy» najbolš palubiŭsia słuchačam, jon admietny tym, što aproč zvykłych rok-instrumentaŭ tut možna pačuć irlandzki cin-vistł.
Prezentavać klip publicy muzyki miarkujuć na svaim bližejšym kancercie 25 vieraśnia ŭ mienskim TNT Rock Club.
Re1ikt — Chadziła hałota (rež.Alesia Łacinskaja). Źmiaščajecca sa zhody vykanaŭcy
Ciapier čytajuć
Čamu ŭ biełaruskaj turmie tak mocna chudziejuć? Tłumačym11
Kamientary