U aŭtarytetnym rejtynhu zdaroŭja ŭ Biełarusi najhoršy pakazčyk siarod postsavieckich krain

Biełaruś zaniała 120-je miesca ŭ rejtynhu, składzienym pa 33 «miedycynskich» indykatarach ustojlivaha raźvićcia. Na adnym uzroŭni ź Biełaruśsiu apynulisia Rasija (119), Ukraina (118) i Siryja (117), napieradzie — KNDR i Handuras.

Rejtynh krain pa indykatarach ustojlivaha raźvićcia, źviazanych ź miedycynaj, žyćciom i zdaroŭjem, byŭ składzieny aŭtarytetnym miedycynskim časopisam The Lancet. Rejtynh (dastupny pa spasyłcy) pabudavany zychodziačy z sumarnaj acenki pa 33 pakazčykach, kožny ź jakich raźličvaŭsia pa škale ad 0 (horšy vynik) da 100.

Siarod kryteraŭ, jakija ŭličvalisia pry ranžyravańni krain, — dziciačaja śmiarotnaść, śmiarotnaść siarod niemaŭlat, śmiarotnaść u darožna-transpartnych zdareńniach, zališniaja vaha ŭ dziaciej, uzrovień spažyvańnia ałkaholu i tytuniekureńnia, zachvorvańnie VIČ, na suchoty i hiepatyt B, kolkaść samahubstvaŭ. Akramia taho, ekśpierty hladzieli na śmiarotnaść ad hvałtoŭnych dziejańniaŭ i śmiarotnaść u vojnach. Raźlik pa kožnym krytery vioŭsia na asnovie analizu situacyi z 1990 pa 2015 hod.

Pieršaje miesca ŭ rejtynhu zaniała Isłandyja. U pieršuju piaciorku taksama ŭvachodziać Sinhapur, Šviecyja, Andora i Vialikabrytanija. Apošniaje, 188-je miesca, zaniała Centralnaafrykanskaja Respublika, dzie zafiksavany najhoršaje stanovišča spraŭ z zachavańniem hihijeny, vielmi vysokaja śmiarotnaść ad vojnaŭ i malaryi.

Biełaruś zajmaje ŭ rejtynhu tolki 120-je miesca ź siarednim pakazčykam 53 z maksimalna mahčymych 100. Dla paraŭnańnia, u lidaraŭ rejtynhu — Isłandyi, Sinhapura i Šviecyi — pa 85 bałaŭ. Na adnoj prystupcy ź Biełaruśsiu raźmiaścilisia Balivija i Jehipiet. Apiaredžvajuć Biełaruś takija krainy, jak Handuras, KNDR, Manholija.

Stanovišča Biełarusi ŭ rejtynhu samaje horšaje siarod krain byłoha SSSR. Najlepšy vynik z krain postsavieckaj prastory — u Estonii (29-je miesca). Tadžykistan, Kazachstan, Azierbajdžan, Turkmienija, Uźbiekistan uvachodziać u pieršuju sotniu.

Indykatary, jakija braŭ dla składańnia rejtynhu The Lancet, hruntavalisia na pryniatych u vieraśni 2015 hoda na Hienasamblei AAN Metach ustojlivaha raźvićcia. Jany ŭklučajuć u siabie 17 hłabalnych metaŭ (likvidacyja halečy, likvidacyja hoładu, zabieśpiačeńnie dostupu da adukacyi i h.d.), 169 zadač i 230 metavych pakazčykaŭ. Mety ŭstojlivaha raźvićcia, pa płanie AAN, pavinny być dasiahnutyja na praciahu 15 hadoŭ.

• 0
• 0
• 0
• 0
• 0
• 0
• 0
• 0