Biełaruskamu žurnalistu, aŭtaru «Našaj Nivy» Siarhieju Vahanavu siońnia spoŭniłasia 75 hadoŭ
Uładzimir Niaklajeŭ napisaŭ z hetaj nahody ŭ svaim fejsbuku:
«6 kastryčnika — jubilej (75) majho daŭniaha siabra Siarhieja Vahanava, ź jakim paznajomiŭsia ja amal paŭstahodździa tamu ŭ redakcyi haziety «Znamia junosti».
Ja moh by skazać pra jaho niamała słoŭ, ale, miarkuju, paŭstahodździa siabroŭstva kaža samo za siabie…
Tamu — prosta vierš z pryśviačeńniem. Da dnia narodzinaŭ i da źjaŭleńnia jahonaj knihi (raju pračytać) «Mościk nad viečnaściu», dzie pra pražyty čas i pra siabie ŭ časie jon sam usio skazaŭ. Nu, ci amal usio…
ŚVIET
Siarhieju Vahanavu
Kali hladzieć na śviet pryvietna,
Nie raspalać u sercy złość —
Śviet nie taki ŭžo biespraśvietny,
Śviatło taksama ŭ śviecie jość.
I ludzi jość, i jość nie ludzi,
I ŭsio, što tut stvaryŭ Haspodź…
I jość sam-Śviet,
Jość cud,
I ŭ cudzie
Jość my — na mih adziny choć…
Dniami ŭ biblijatecy «Kniharnia piśmieńnika» vyjšła kniha Siarhieja Vahanava «Mościk nad viečnaściu. Narysy i ese», kudy sabranyja artykuły, što drukavalisia ŭ «Našaj Nivie» i «Narodnaj voli».
Kamientary