Беларускаму журналісту, аўтару «Нашай Нівы» Сяргею Ваганаву сёння споўнілася 75 гадоў
Уладзімір Някляеў напісаў з гэтай нагоды ў сваім фэйсбуку:
«6 кастрычніка — юбілей (75) майго даўняга сябра Сяргея Ваганава, з якім пазнаёміўся я амаль паўстагоддзя таму ў рэдакцыі газеты «Знамя юности».
Я мог бы сказаць пра яго нямала слоў, але, мяркую, паўстагоддзя сяброўства кажа само за сябе…
Таму — проста верш з прысвячэннем. Да дня народзінаў і да з'яўлення ягонай кнігі (раю прачытаць) «Мосцік над вечнасцю», дзе пра пражыты час і пра сябе ў часе ён сам усё сказаў. Ну, ці амаль усё…
СВЕТ
Сяргею Ваганаву
Калі глядзець на свет прыветна,
Не распаляць у сэрцы злосць —
Свет не такі ўжо беспрасветны,
Святло таксама ў свеце ёсць.
І людзі ёсць, і ёсць не людзі,
І ўсё, што тут стварыў Гасподзь…
І ёсць сам-Свет,
Ёсць цуд,
І ў цудзе
Ёсць мы — на міг адзіны хоць…
Днямі ў бібліятэцы «Кнігарня пісьменніка» выйшла кніга Сяргея Ваганава «Мосцік над вечнасцю. Нарысы і эсэ», куды сабраныя артыкулы, што друкаваліся ў «Нашай Ніве» і «Народнай волі».
Каментары