«Kazaŭ, što nie razumieje, navošta jamu vučycca ŭ biełaruskaj himnazii», — adnakłaśnik pra zabojcu z HC «Jeŭropa»
«Kazaŭ, što jamu nie padabajecca biełaruskaja mova i jon nie razumieje, navošta jamu vučycca ŭ biełaruskamoŭnaj himnazii», — adnaklaśnik z pačatkovaj škoły 23-j himnazii Miensku apaznaŭ Ułada K. na fatazdymkach.
«Ja ŭpeŭnieny, što heta jon. Viedaju, što ŭ jaho jość starejšaja siastra, što jany zamožnyja», — kaža małady čałaviek. Paśla sychodu Ŭłada z 23-j himnazii jany jašče paru hadoŭ kamunikavali.
«Jon lubiŭ u mianie doma byvać, my hulali na kamputary. Ale dzie jon žyŭ, ja nikoli nia viedaŭ. My žyli ŭ adnym rajonie i katalisia na rovarach razam. I jon vielmi lubiŭ razmaŭlać pa telefonie», — raspaviadaje małady čałaviek. Pavodle jaho, Uład u małym uzroście byŭ svojeasablivym chłopcam. U tuju paru lubiŭ pahulać u «kryvavyja» kamputarnyja hulni.
«Kali, naprykład, ź jaho kpili adnaklaśniki, to jon prosta apantana pačynaŭ šaleć i złavacca. Tady jon vyhladaŭ vielmi strašna. Ja kali pieršy raz takoje pabačyŭ, to padumaŭ, što niešta z hetym čałaviekam nia tak. Bo takoha prosta čakać nielha było, — raspaviadaje małady čałaviek. — Redka, ale byvała takoje». Praŭda, jak jon pamiataje, Uład nia byŭ siarod tych, kaho ckujuć u škole. Chutčej siarod tych, chto ckuje.
«Ja b skazaŭ, što jon byŭ hiperaktyŭny ŭ pačatkovaj škole. Lubiŭ asobna ad usich malavać, mieŭ svojeasablivy humar. Z vučobaj byŭ nie ŭ siabrach, i navat u piataj klasie ŭ jaho nia vielmi byli dobryja adznaki. Ale stasunki z usimi byli narmalnyja, a ja ź im siabravaŭ», — kaža chłapiec.
Što da siamji, to baćku Ŭłada chłapiec nia pamiataje zusim. «Mamu časam bačyŭ. Jana hatavała vielmi smačnaje piečyva, jakoje ŭsioj klasie padabałasia».
«Ja voś prosta ŭ razmovie z vami zhadaŭ adzin epizod ź jahonaha žyćcia, kali ŭ jaho zhareŭ dom, — raspaviadaje małady čałaviek. — Nia pamiataju dakładna, što za pryčyna była, niejkaja techničnaja. Jon sam byŭ doma, pa jaho pryjechała siastra, vyratavała. Zhareli ŭsie jahonyja cacki, rečy — usio. U jaho šok byŭ. Jon na nastupny dzień mnie pazvaniŭ i pra heta raspavioŭ».
***
8 vieraśnia 17-hadovy pieršakurśnik Uład K. napaŭ z benzapiłoj i siakieraj na ludziej u handlovym centry «Eŭropa». 43-hadovaja žančyna zahinuła na miescy, 46-hadovaja atrymała traŭmy i znachodzicca ŭ reanimacyi. Jašče adna paciarpiełaja ź niaznačnymi paškodžańniami zastajecca doma.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary