Navukoŭcy Škoły miedycyny Bostanskaha univiersiteta Denieł Aaran i Majkł Sihieł zajavili, što najbujniejšyja vytvorcy hazavanych napojaŭ — kampanii Coca-Cola i PepsiCo — finansavali jak minimum 96 roznych arhanizacyj sa śfiery achovy zdaroŭja, piša medportal.ru sa spasyłkaj na medicalnewstoday.com.
Viadoma, što zališniaje ŭžyvańnie cukru škodzić zdaroŭju — jano moža pryvieści da atłuścieńnia, dyjabietu i raźvićcia zachvorvańniaŭ sardečna-sasudzistaj sistemy. Pa hetaj pryčynie hihanty industryi, prasoŭvajučy ŭłasnyja intaresy, płacili daśledčym arhanizacyjam, kab tyja pry praviadzieńni navukovych daśledavańniaŭ publikavali vyniki, jakija padtrymlivajuć łobi Coca-Cola i PepsiCo.
Zusim niadaŭna žurnalisty The New York Times raspaviali, što na praciahu doŭhaha času infarmacyju pra škodu cukru ŭtojvali — vytvorcy płacili daśledčykam za maŭčańnie. Toje ž samaje adbyvałasia i na rynku sałodkich hazavanych napojaŭ, rost spažyvańnia jakich staŭ u ZŠA vialikaj prablemaj.
Denieł Aaran i Majkł Sihieł praanalizavali infarmacyju pra toje, jakija kampanii atrymlivali hrošy ad Coca-Cola i PepsiCo. Akazałasia — na asnovie infarmacyi tolki z adkrytych krynic — što Coca-Cola spansavała 83 kampanii sa śfiery achovy zdaroŭja, PepsiCo — adnu, jašče 12 firmaŭ brali hrošy ŭ abodvuch hihantaŭ. Pakolki PepsiCo nie drukuje śpis kampanij, jakim płacić, chutčej za ŭsio na samaj spravie ahulnaja kolkaść arhanizacyj, jakija atrymlivali finansavańnie ad vytvorcaŭ hazavanych napojaŭ, značna pieravyšaje 96.
Abodva hihanty industryi taksama viali aktyŭnuju kampaniju suprać 28 zakonaprajektaŭ u śfiery achovy zdaroŭja ZŠA. Hetyja dakumienty pavinny byli pajści na karyść zdaroŭju amierykancaŭ, adnak jany b źnizili prybytak Coca-Cola i PepsiCo.
Usiaho za 2011-2015 hady vytvorcy patracili kala 10 miljonaŭ dalaraŭ na supraćdziejańnie inicyjatyvam urada ŭ halinie achovy zdaroŭja (bolš za 6 i bolš za 3 miljony adpaviedna). Vyśvietliłasia, što hrošy brali navat takija, zdavałasia b, zacikaŭlenyja arhanizacyi, jak American Diabetes Association i Diabetes Research Foundation.
Supracoŭniki Bostanskaha ŭniviersiteta nastojliva rekamiendavali arhanizacyjam sa śfiery achovy zdaroŭja spynić brać hrošy ŭ vytvorcaŭ škodnych napojaŭ i znajści alternatyŭnyja krynicy finansavańnia. Na dumku Aarana i Sihieła, situacyja, jakaja skłałasia, robić hetyja arhanizacyi častkaj markietynhavaj stratehii Coca-Cola i PepsiCo.
Ciapier čytajuć
U Maskvie mužčyny masava sprabujuć znajomicca, macajučy dziaŭčat za jahadzicy. Tak zahadaŭ rabić seks-koŭč ź Biełarusi17
Kamientary