Rasija zakłapočanaja paharšeńniem adnosin z ZŠA, adnak vieści dyjałoh ź dziejučaj administracyjaj niemahčyma, zajaviŭ u chodzie forumu «Rasija kliča» rasijski prezydent Uładzimier Pucin.
AFP
«Bo dyjałohu praktyčna niama. Jon jak vyhladaje? Administracyja farmuluje, što joj treba, a potym nastojvaje na tym, kab heta było vykanana. Ale heta nie dyjałoh, heta dyktat niejki. I tak amal pa kožnym pytańni», — skazaŭ Pucin.
Pavodle jaho słoŭ, dyjałoh — heta pošuk kampramisaŭ. «Treba pavodzić siabie pa-partniorsku i ŭličvać intaresy adno adnaho. My da hetaha hatovyja», — zajaviŭ jon.
Zakranajučy temu amierykanskich vybaraŭ, Pucin zajaviŭ, što Maskva budzie pracavać ź lubym lidaram, jakoha abiare amierykanski narod, kali novy prezident taho zachoča.
«Amierykanski narod zrobić vybar, jaki paličyć patrebnym. Pry lubym raskładzie my budziem pracavać ź lubym lidaram Złučanych Štataŭ, chto b ni byŭ prezidentam, kali kiraŭnik Złučanych Štataŭ choča pracavać z nami», — skazaŭ Pucin.
Napiaredadni pres-sakratar Biełaha doma Džoš Ernest zajaviŭ, što prezident ZŠA Barak Abama razhledzić šerah mier u adkaz na ŭzłom sajtaŭ ŭradavych arhanizacyj ZŠA, u jakim ministerstva ŭnutranaj biaśpieki ZŠA niadaŭna aficyjna abvinavaciła Rasiju.
«U rasparadžeńni prezidenta majecca niekalki varyjantaŭ mier u adkaz, i jon razhledzić tyja ź ich, jakija paličyć praparcyjnymi, — zajaviŭ Ernest žurnalistam. — Całkam mahčyma, što prezident abiare adzin z tych varyjantaŭ adkazu, pra jakija my nie abjaŭlajem zahadzia».
