Były prezident SSSR Michaił Harbačoŭ vyklikany ŭ sud jak śviedka ŭ ramkach spravy ab padziejach 13 studzienia 1991 hoda ŭ Vilni, kali televiežu i budynak Kamiteta radyjo i TB šturmavali savieckija vajennyja.
Ideja pryciahnuć Harbačova jak śviedku naležyć synu zahinułaha padčas hetych padziej Apalinarasa Paviłajcisa. Jon ličyć, što Harbačoŭ moh viedać pra toje, što vajennyja źbirajucca pajści na šturm telecentra, jaki adstojvali demanstranty, i adkryć ahoń pa natoŭpie.
U vyniku šturmu telecentra ŭ Vilni ranicaj 13 studzienia 1991 hoda zahinuli 14 čałaviek, sotni atrymali ranieńni. U suviazi z hetym było raspačataja adna z najbujniejšych u historyi litoŭskaha pravasudździa spraŭ, jakaja ŭ 2010 hodzie była pierakvalifikavanaja na vajennaje złačynstva.
Ułady Litvy raniej sprabavali dapytać pa hetaj spravie Harbačova, adnak rasijski bok kožny raz admaŭlaŭsia. Tak, u studzieni 2016 hoda Hienprakuratura Litvy paviedamlała, što Rasija admoviłasia dapytać pa prośbie litoŭskich prakuroraŭ byłoha prezidenta SSSR.
Pa tahačasnaj viersii savieckich uładaŭ, armija atakavała vilenski telecentr u adkaz na prośbu «Kamiteta nacyjanalnaha vyratavańnia» — arhanizacyi, stvoranaj centralnym kamitetam Litoŭskaj kamunistyčnaj partyi.
Vojski zaniali televyški i teleradyjocentr, adnak, sutyknuŭšysia z supracivam demanstrantaŭ, tak i nie zdoleli zachapić budynak parłamienta.
Litva abviaściła niezaležnaść ad Savieckaha Sajuza 11 sakavika 1990 hoda, adnak Maskva paličyła heta rašeńnie antykanstytucyjnym.
Kamientary