U Biełarusi skaračajecca kolkaść nasielnictva va ŭsich rehijonach akramia Minska
U Biełarusi skaračeńnie kolkaści nasielnictva charakterna dla ŭsich rehijonaŭ akramia Minska, paviedamiła dyrektar NDI pracy Ministerstva pracy i sacyjalnaj abarony Taćciana Mironava 17 listapada.
Daśledavańnie było praviedziena sioleta NDI pracy z pryciahnieńniem ekśpiertaŭ pry padtrymcy Fondu AAN u halinie narodanasielnictva (JUNFPA), infarmuje BiełaPAN.
Pavodle jaje słoŭ, najmienšaja strata nazirajecca ŭ Bresckaj i Homielskaj abłaściach, dzie kolkaść nasielnictva z 1999 hoda pa 2016-y skaraciłasia na 6,6% i 7,9% adpaviedna. Va ŭsich astatnich rehijonach skaračeńnie ŭ siarednim na 10% za 17 hadoŭ. Samyja vialikija demahrafičnyja straty ŭ Viciebskaj vobłaści, što «tłumačycca bolš mocnym faktaram stareńnia nasielnictva i bolš maštabnym mihracyjnym adtokam nasielnictva».
Mihracyjny viektar ŭnutry krainy zaryjentavany na stalicu, dzie ciapier pražyvaje 20% nasielnictva Biełarusi (16% u 1999 hodzie). U stalicy zasiarodžanaja samaja vialikaja kolkaść nasielnictva va ŭzroście maładziej za pracazdolny — 249,9 tys. čałaviek. Tut pražyvaje prykładna kožny piaty małady čałaviek.
Dla ŭsich rehijonaŭ akramia Minska charakterna skaračeńnie kolkaści nasielnictva ŭ pracazdolnym uzroście. U stalicy žyvie 22% nasielnictva pracazdolnaha ŭzrostu Biełarusi - za 1 młn 214 tys. 800 čałaviek. U daśledavańni adznačajecca, što heta bolš, čym kolkaść žycharoŭ Viciebskaj, Hrodzienskaj abo Mahiloŭskaj vobłaści.
U toj ža čas u stalicy zasiarodžanaja i samaja vialikaja častka ludziej starejšych za pracazdolny ŭzrost — 434,4 tys. čałaviek, abo 18%.
Mironava adznačyła, što pry raspracoŭcy dziaržaŭnych mier u śfiery demahrafičnaj biaśpieki nieabchodna ŭličvać asablivaści rehijonaŭ.
Kamientary