Facebook raspracavaŭ prahramu dla cenzury navin u stužkach karystalnikaŭ
Amierykanskaja kampanija Facebook raspracavała ŭłasnaje prahramnaje zabieśpiačeńnie dla cenzuravańnia paviedamleńniaŭ u navinavych stužkach karystalnikaŭ u niekatorych rehijonach, pra heta sa spasyłkaj na try krynicy ŭ kampanii piša The New York Times.
Pa słovach surazmoŭcaŭ vydańnia, padobnaja funkcyja była stvorana dla taho, kab dapamahčy viarnucca Facebook na kitajski rynak, dzie sacyjalnaja sietka była zabłakavanaja. Jak udakładnili krynicy haziety, novaja funkcyja, u pieršuju čarhu, dazvolić «praduchilić» źjaŭleńnie niekatorych paviedamleńniaŭ mienavita ŭ navinavych stužkach kitajcaŭ.
Zasnavalnik kampanii Mark Cukierbierh, jak raspaviali surazmoŭcy NYT, usialak «padtrymlivaŭ i abaraniaŭ namahańni» raspracoŭščykaŭ dla stvareńnia padobnaj prahramy.
Pa dadzienych krynic haziety, Facebook nie źbirajecca samastojna ažyćciaŭlać kantrol nad kantentam, hetyja paŭnamoctvy buduć pieradadzienyja «treciamu boku». Takim čynam, jak raspaviali surazmoŭcy vydańnia, u dadzienym vypadku, chutčej za ŭsio, manitorynham «papularnych siužetaŭ i tem», jakija raspaŭsiudžvajucca ŭ sacyjalnaj sietcy, budzie zajmacca kitajski partnior Facebook.
Jak udakładniaje vydańnie, u kampanii padobnuju funkcyju ličać demanstracyjaj stupieni, u jakoj Facebook hatovy pajści na kampramis u dačynieńni da svaich asnoŭnych pryncypaŭ, a mienavita — «zrabić śviet bolš adkrytym» i «ŭstalavać suviazi» pamiž ludźmi. Adstupicca ad niekatorych punktaŭ u hetych ustanoŭkach u kampanii hatovyja, kab atrymać dostup da rynku z 1,4 młrd karystalnikaŭ, paviedamili krynicy The New York Times.
Jak nahadvaje vydańnie, u 2015 hodzie ad lipienia da śniežnia Facebook zabłakavaŭ kala 55 tysiač paviedamleńniaŭ u 20 krainach śvietu, siarod jakich — Pakistan, Rasija i Turcyja. Abmiežavańni, u cełym, adpaviadali ŭradavym zapytam na błakavańnie peŭnaha kantentu, zaŭvažaje NYT.
U pačatku vieraśnia najbujniejšaja narviežskaja hazieta Aftenposten abvinavaciła Facebook ŭ cenzury i «złoŭžyvańni ŭładaj» za vydaleńnie z paviedamleńnia vydańnia ŭ sacsietcy zdymka pra vajnu ŭ Vjetnamie. Tam była vyjava aholenaj dziaŭčynki, paciarpiełaj ad prymianieńnia napałmu. Na nastupny dzień fotazdymak pra vajnu ŭ Vjetnamie byŭ adnoŭleny, paviedamlaje RBK.
Kamientary