Upieršyniu ŭručanaja Hiermana-Francuzskaja premija «Za pravy čałavieka i viaršenstva zakonu»

Na hetym tydni Hiermanija i Francyja ŭšanoŭvajuć śmiełych žančyn i mužčyn, jakija pa ŭsim śviecie vystupajuć za pravy svaich suhramadzian.

Havorka idzie pra takich ludziej, jak braziljanka Maryja da Piencha, jakaja paśla napadu na jaje ŭłasnaha muža prykavanaja da invalidnaha vazka i siońnia ŭparta zmahajecca za abaronu žančyn ad siamiejnaha hvałtu. Sunita Kryšnan ź Indyi vystupaje suprać prymusovaj prastytucyi i handlu ludźmi ŭ svajoj krainie, dzie mnohich maładych žančyn, navat dziaŭčynak, zmušajuć da prastytucyi. U Čadzie Žaklin Mudejna vielmi mužna i z pośpiecham zmahałasia za toje, kab pryciahnuć byłoha prezidenta Chisiene Chabre da adkazu za ździejśnienyja ŭ pieryjad jaho znachodžańnia va ŭładzie złačynstvy. U Siryi Rajed al-Salech raniej byŭ biznesmienam i zajmaŭsia handlem elektratechnikaj. Siońnia jon źjaŭlajecca kiraŭnikom «Biełych kasak» — hrupy vałancioraŭ, jakija dapamahajuć vyciahvać ludziej z ruinaŭ paśla avijaŭdaraŭ i adnaŭlać razburanuju infrastrukturu. Časta pry vykanańni svajoj misii jany ryzykujuć žyćciom.

Usie jany — ludzi z samych roznych kutkoŭ śvietu. Ludzi, na jakich zusim rozny dośvied nakłaŭ svoj adbitak. Adnak adno abjadnoŭvaje ich usich: jany zmahajucca za pravy bližniaha svajho.

Dla taho, kab addać naležnaje hetym mužnym žančynam i mužčynam va ŭsim śviecie, my vyrašyli sumiesna zasnavać Hiermana-Francuzskuju premiju «Za pravy čałavieka i viaršenstva zakonu». Na hetym tydni my ŭpieršyniu jaje ŭručym.

Hetaj premijaj my šanujem ludziej, jakija ź vialikaj samaaddačaj rašuča vystupajuć u abaronu inšych. Pry hetym jany časta padviarhajuć siabie vialikaj ryzycy i pracujuć u vielmi składanych umovach. Hetyja žančyny i mužčyny zasłužyli našu padziaku i padtrymku.

Dla Hiermanii i Francyi abarona i prasoŭvańnie pravoŭ čałavieka źjaŭlajucca centralnym elemientam našaj źniešniepalityčnaj dziejnaści. Pravy čałavieka — heta asnova i nieabchodnaja ŭmova dla miru i spraviadlivaści ŭ našym śviecie. Tamu my jak mižnarodnaja supolnaść paśla žudasnych vojnaŭ XX stahodździa abviaścili pra svaju prychilnaść da abarony i prasoŭvańnia hetych pravoŭ — u ramkach Arhanizacyi Abjadnanych Nacyj, ABSIE, Rady Jeŭropy i Jeŭrapiejskaha sajuza.

Siońnia, adnak, my pavinny zrabić usio dla taho, kab hetyja vialikija dasiahnieńni nie byli pad pytańniem. My bačym, što takaja pahroza ich razmyvańnia isnuje — u śviecie, u jakim usio bolš uradaŭ abmiažoŭvajuć hramadskija i indyvidualnyja svabody, prykryvajučysia mierkavańniami biaśpieki, palityčnaj stabilnaści ci kulturnych asablivaściaŭ. My heta nazirajem i ŭ demakratyčnych krainach. Tam, dzie aryštoŭvajuć žurnalistaŭ, advakataŭ i členaŭ niaŭradavych arhanizacyj. Tam, dzie prysutničaje spakusa ŭźvieści novyja ścieny, choć historyja nas vučyć, što ścieny nikoli nie vyrašajuć prablem.

Hiermanija i Francyja rašuča supraćstajać hetamu.

My abodva padčas našych sumiesnych pajezdak na ŭłasnyja vočy ŭbačyli, što byvaje, kali ludziam admaŭlajuć u ich fundamientalnych pravach. Tamu my pa ŭsim śviecie vystupajem za ich abaronu i prasoŭvańnie. Pry hetym my vykarystoŭvajem uvieś śpiektr instrumientaŭ našaj źniešniaj palityki — ad padtrymki miascovych pravaabaroncaŭ da sadziejničańnia demakratyčnamu dziaržaŭnamu kiravańniu; ad praduchileńnia kryzisaŭ da postkanfliktnaha adnaŭleńnia.

Jak ministry zamiežnych spraŭ, my budziem uparta praciahvać baraćbu za toje, kab nie tolki vyjaŭlać vypadki parušeńnia pravoŭ čałavieka, ale i aktyŭna abaraniać ludziej ad abmiežavańnia asnoŭnych svabodaŭ. Baraćbu za pravy čałavieka my pavinny vieści sumiesna i na ŭsich uzroŭniach. A Hiermana-Francuzskaja premija «Za pravy čałavieka i viaršenstva zakonu» — simvał hetaha.

Łaŭreatami premii ŭ hetym hodzie, prapanavanymi našymi hiermanskimi i francuzskimi zamiežnymi pradstaŭnictvami, źjaŭlajucca: Tachmina Rachman (Banhładeš), Aleh Hułak (Biełaruś), Maryja da Piencha (Brazilija), Tun Saraj (Kambodža), Maksimilijen Nho Mbie (Kamierun), Bievierli K. Džejkabs (Kanada), Žaklin Mudejna (Čad), Van Ciaalin (Kitaj), Mantsierat Sałana Karboni (Kosta-Ryka), Sunita Kryšnan (Indyja), Mery Łoŭler (Irłandyja), Pjetra Bartała (Italija), Eva Abu Chałavie (Iardanija), Sara Biełal (Pakistan) i Valancina Čaravacienka (Rasija). Śpiecyjalnaja premija prysudžajecca siryjskaj arhanizacyi «Biełyja kaski».

• 0
• 0
• 0
• 0
• 0
• 0
• 0
• 0