Dziasiatki ludziej ličacca źnikłymi bieź viestak paśla pažaru ŭ kulturnym centry ŭ Okłendzie, Kalifornija, padčas rejv-viečarynki, arhanizavanaj miascovymi mastakami, piša VVS.
Aficyjna paćvierdžanaja hibiel dzieviaci čałaviek, ale kolkaść achviar moža ŭzraści da saraka, papiaredziła kiraŭnik pažarnaj słužby Okłenda Tereza Diełaš-Ryd.
Kolkaść čałaviek, jakija znachodzilisia ŭ budynku, aceńvajecca ŭ 50-100. Bolš dakładnych dadzienych niama, bo kvitki na mierapryjemstva nie pradavalisia.
Pažar pačaŭsia ŭ 23:30 pa miascovym časie ŭ piatnicu. Pryčyna ŭzharańnia nieviadomaja.
U pamiaškańni hraŭ zaprošany mastakami elektronny hurt Golden Donna. Pra hety kancert i šeść inšych vystupaŭ arhanizatary zahadzia apaviaścili praz fejsbuk.
Stary skład byŭ pieraabstalavany ŭ studyi dla mastakoŭ, u asnoŭnym maładych. Častka ź ich nie tolki pracavała, ale i žyła ŭ im, choć haradskija ŭłady nie davali dazvołu na vykarystańnie budynka dla žylla.
Pa słovach Terezy Diełaš-Ryd, u kulturnym centry adsutničali sistemy supraćpažarnaj sihnalizacyi i aŭtamatyčnaha pažaratušeńnia, adzinym vychadam z druhoha paviercha źjaŭlałasia draŭlanaja leśvica, a prachody byli tak zahruvaščanyja meblaj, maniekienami, padramnikami i roznymi rečami, jakija naležali mastakam, što pažarnyja ź ciažkaściu prakładali sabie šlach da krynicy ŭzharańnia.
«Čaho tam tolki nie było, sapraŭdny łabirynt», — skazała Diełaš-Ryd.
Kiraŭnik departamienta budaŭnictva administracyi Okłenda Daryna Ranieleci abiacaje pravieści kampietentnaje rasśledavańnie.
Pažar staŭ samaj strašnaj trahiedyjaj u horadzie z 1989 hoda, kali ziemlatrus zabraŭ žyćci 63 čałaviek.
Samy katastrafičny pažar padobnaha rodu ŭ historyi ZŠA mieŭ miesca ŭ 2003 hodzie ŭ štacie Rod-Ajłend. Z-za piratechničnych efiektaŭ padčas kancertu hrupy Great White uspychnuŭ načny kłub. Tady zahinuli kala sta čałaviek.
Ciapier čytajuć
Čamu ŭ biełaruskaj turmie tak mocna chudziejuć? Tłumačym8
Kamientary