Kiraŭnik rasijskaha PEN-centra vykazaŭ žadańnie «zajechać pa fizijanomii» Śviatłanie Aleksijevič
Usio jašče nie ścichajuć žarści vakoł vychadu biełaruskaj piśmieńnicy, łaŭreata Nobieleŭskaj premii pa litaratury Śviatłany Aleksijevič z rasijskaha PEN-centra. Heta adbyłosia paśla taho jak z arhanizacyi pa palityčnych pryčynach byŭ vyklučany žurnalist Siarhiej Parchomienka.
«Sprava ŭ tym, što źnievažajucca ŭsie ideały zasnavalnikaŭ PENa. Kanflikt z Parchomienkam adbyŭsia z-za taho, što nie pieršy raz užo Ruski PEN admaŭlajecca padpisvać listy ŭ abaronu ludziej, jakija pakutujuć ad pucinskaj ułady. PEN dekłaravaŭ, što heta nie sprava piśmieńnikaŭ — kahości abaraniać, štości adstojvać, sprava piśmieńnikaŭ siadzieć cichieńka i pisać — to bok, ščyra skazaŭšy, ablizvać boty ŭłady», — žorstka adreahavała na heta Śviatłana Aleksijevič, dajučy kamientar »NN».
Kiraŭnik rasijskaha PEN-centra Jaŭhien Papoŭ, dajučy pres-kanfierencyju ŭ ofisie dziaržaŭnaha infarmacyjnaha ahienctva TASS, vyrašyŭ jašče raz zakranuć pytańnie Aleksijevič.
«Jana demanstratyŭna vyjšła z kłuba i paviedamiła naprykancy, lasnuŭšy dźviarami, što hety kłub liža boty ŭłady. Kali b mnie heta skazaŭ mužčyna, to ja b jamu źjeździŭ pa fizijanomii. Ale dama jość dama», — cytujuć słovy Papova rasijskija vydańni.
Taksama Papoŭ praciahvaŭ, što nijakich śladoŭ znachodžańnia Aleksijevič u rasijskim PEN-centry niama. A jak ža členski bilet, jaki prademanstravała sama piśmieńnica? Papoŭ pierakanany, što jaho mahli vydać pa znajomstvie, kab Aleksijevič atrymała vizy. «Hety bilet nie dokaz», — skazaŭ piśmieńnik.
Jaŭhienu Papovu 71 hod, jon uznačaliŭ rasijski PEN-centr u śniežni 2016 hoda, adrazu paśla hetaha ŭ arhanizacyi pačalisia čystki. U znak pratestu PEN pakinuła nie tolki Aleksijevič, ale i inšyja viadomyja aŭtary — Barys Akunin, Uładzimir Sarokin, Uładzimir Vajnovič.
Kamientary