Mahiloŭskaja milicyja inicyjavała vyjaznyja sudy pa siamiejna-pobytavych złačynstvach

UUS Mahiloŭskaha abłvykankama maje namier arhanizavać vyjaznyja sudy pa siamiejna-pobytavych złačynstvach u kožnym rajonie vobłaści.

Jak zajaviŭ 27 studzienia na pres-kanfierencyi načalnik UUS Mahiloŭskaha abłvykankama Alaksandr Kavalčuk, uskładniłasia situacyja, źviazanaja ź siamiejna-bytavymi adnosinami. Šmat u čym, pavodle jaho słoŭ, prablema zaklučajecca ŭ niesvoječasovaści atrymańnia infarmacyi ab takich supraćpraŭnych dziejańniach i niežadańni paciarpiełych «vynosić śmiećcie z chaty».

Z metaj papiaredžańnia pjanstva i ŭčynieńnia asabliva ciažkich i ciažkich złačynstvaŭ pa faktach nasilla ŭ siamji ŭ 2016 hodzie raspačata 473 spravy, što na 17% bolš, čym, u 2015 hodzie, pa previentyŭnych artykułach 153, 154 i 186 Kryminalnaha kodeksa.

«My pastavili pierad saboj zadaču maksimalna palepšyć jakaść indyvidualna-prafiłaktyčnaj raboty», — zajaviŭ Kavalčuk. Ciapier, pavodle jaho słoŭ, kožnaje paviedamleńnie pra siamiejna-pobytavuju niepaśpiachovaść biarecca na kantrol. «I my z ulikam važnaści raźmiežavali stupieni hetaha kantrolu. Kali raniej hetym bolš zajmaŭsia ŭčastkovy inśpiektar, to dla taho, kab pavysić jakaść hetaj raboty, uziaŭšy na kantrol takoje paviedamleńnie, my ŭžo vyrašajem, chto budzie padklučacca da hetaj prablemy. Pa ŭsich asobach, jakija stajać na ŭliku, mnoj dajecca ŭkazańnie raźbiracca asabista načalnikam RAUS», — zajaviŭ kiraŭnik abłasnoj milicyi.

«U lutym płanujem u kožnym rajonie sabrać tych asob, jakija stajać na ŭliku za ŭčynieńnie złačynstvaŭ i pravaparušeńniaŭ u śfiery siamiejna-bytavych adnosin, i pravieści adkrytyja vyjaznyja pasiadžeńni sudoŭ. Kab hetym ludziam jašče raz pakazać, jakija nastupstvy nastupiać i da čaho mohuć pryvieści takija supraćpraŭnyja pavodziny», — skazaŭ Kavalčuk.

Načalnik UUS jak i raniej ličyć, što z metaj baraćby sa złačynstvami, što ŭčyniajucca pad uździejańniem ałkaholu, metazhodna ŭvieści zabaronu na handal śpirtnym u načny čas. Jon upeŭnieny, što ekanamičny efiekt ad takoha handlu, jaki nie patrabujecca dla bolšaści nasielnictva, nikčemny, kali ŭličyć usie admoŭnyja momanty ad jaho. «My abaviazanyja danieści da ŭłady, da hramadstva ŭsie niehatyŭnyja momanty, jakija źviazanyja z pryniaćciem rašeńnia ab realizacyi śpirtnych napojaŭ», — adznačyŭ jon, pryličyŭšy da takich, u pryvatnaści, roznyja traŭmy, stratu niepracazdolnaści, chvaroby, źviazanyja sa złoŭžyvańniem śpirtnoha, paharšeńnie zdaroŭja nasielnictva ŭ cełym.

«Vaźmicie Rasijskuju Fiederacyju. Tam pryniataja na zakanadaŭčym uzroŭni poŭnaja zabarona na realizacyju śpirtnych napojaŭ u načny čas», — skazaŭ Kavalčuk, adznačyŭšy, što ŭ Biełarusi ŭ hetym vypadku rašeńnie ab prodažy ałkaholu ŭnačy pryniataje, kab dahadzić mienšaj častcy nasielnictva, «i viadoma, łabirujucca intaresy vytvorcaŭ śpirtnych napojaŭ».

• 0
• 0
• 0
• 0
• 0
• 0
• 0
• 0