Kredytorskaja zapazyčanaść hrupy «Jeŭrahandal» (najbujniejšy aktyŭ — roźničnaja sietka «Jeŭraopt») znachodzicca na kantroli va ŭradzie. U apošnija 2 hady pazykovaja nahruzka źnižałasia nie vielmi vysokimi tempami, što vyklikała surjoznuju zakłapočanaść biełaruskich bankaŭ. Na fonie historyj z «Rodnaj staronkaj» i «Prastoram» zaniepakojenaść pavialičyłasia ŭdvaja, piša Tut.by.
Niekalki tydniaŭ tamu prablemu «Jeŭraopta» abmiarkoŭvali za začynienymi dźviaryma ŭ Saŭminie. Na pasiadžeńnie tak zvanaha kłuba kredytoraŭ byli zaprošanyja kiraŭniki 10 najbujniejšych bankaŭ Biełarusi, pieršyja asoby Minfina, Ministerstva antymanapolnaha rehulavańnia i handlu, Nacbanka i Ministerstva pa padatkach i zborach.
U 2014 hodzie kiraŭnik «Jeŭraopta» Andrej Zubkoŭ kazaŭ pra kredyty ŭ 500 młn dalaraŭ. Jon ich razhladaŭ jak «inviestycyi ŭ ekanomiku krainy dla raźvićcia sumiežnych halin».
Ciapier krynicy nazyvajuć pazykovuju nahruzku hrupy «Jeŭrahandal» u rajonie 700—750 młn dalaraŭ. U samoj kampanii hetyja ličby nie ahučvajuć.
Jak vynikaje sa spravazdačnaści rytejlera, klučavyja kredytory — heta rasijskija banki i ich biełaruskija «dočki» (Alfa-Bank, BPS-Śbierbank i Biełhazprambank). «Historyja ciahniecca ŭžo daŭno. Rasijskija banki zapatrabavali raźlikaŭ, uhledzieŭšy ŭ dziejańniach rytejlera vysokija ryzyki. Kali kredyty skončylisia, pačałasia padtrymka za košt inšych instrumientaŭ. U tym liku i za košt vyručki», — raspaviali try nie źviazanyja adzin z adnym bankiry.
«Jeŭrahandal» uvachodzić u čaćviorku najbujniejšych kredytaatrymalnikaŭ u krainie razam z bujnymi dziaržpradpryjemstvami, kaža profilny čynoŭnik i bankir. «Prablem z kredytavańniem u «Jeŭrahandlu» nie było — sietka rasła, banki adnosili kampaniju da pazyčalnikaŭ pieršaj hrupy (heta značyć, ź minimalnymi ryzykami). Pakul karcina nie pałochaje — kampanija navat źniziła sumarny doŭh za try hady. Ale — niaznačna. U vyniku mienavita pad takich pazyčalnikaŭ uvodziać narmatyŭ, jaki abmiažoŭvaje jaho kredytavańnie. Situacyja moža pamianiacca, kali ŭ kapitał «Jeŭrahandlu» ŭvojdzie IFC. Ułasna, sam fakt takich pieramoŭ i vysokaj stupieni hatoŭnaści novaha akcyjaniera ŭkłaścisia ŭ «Jeŭrahandal» dakazvaje, što finansavaje stanovišča kampanii, niahledziačy na daŭhi, niadrennaje», — śćviardžaje krynica, znajomaja z chodam narady va ŭradzie.
U žniŭni minułaha hoda źjaviłasia paviedamleńnie ab tym, što «Jeŭraopt» hatovy pradać dolu Mižnarodnaj finansavaj karparacyi (IFC) i refinansavać pazyki na 200 młn dalaraŭ. Na zaćviardžeńnie savieta dyrektaraŭ IFC byŭ vyniesieny prajekt ahulnym koštam 291 młn dalaraŭ, jaki płanujecca realizavać u 2016-2019 hh. Ź ich 91 młn dalaraŭ pryznačany dla inviestycyj u pašyreńnie sietki i klijenckaj bazy, a 200 młn. — na refinansavańnie abaviazacielstvaŭ «Jeŭrahandal».
Jak pišuć Naviny.by, na fonie vysokaj kredytorskaj zapazyčanaści usio čaściej hučać paviedamleńni, što z partniorami pa biznesie za pastaŭlenuju pradukcyju i akazanyja pasłuhi «Jeŭrahandal» raźličvajecca siertyfikatami na kuplu tavaraŭ u sietcy «Jeŭraopt».
Jak raspavioŭ dyrektar kampanii, jakaja pastaŭlaje ŭ «Jeŭraopt» kandytarskija vyraby, užo minimum hod naŭzamien častki hrošaj za pastaŭlenuju pradukcyju jany atrymlivajuć padarunkavyja siertyfikaty. Pavodle jaho słoŭ, kampanija vymušanaja prymać takuju formu raźlikaŭ, kab mieć abarotnyja srodki dla vypłaty zarpłaty. U padobnaj situacyi akazałasia kampanija «Minsktorhavtotrans», jakaja akazvaje «Jeŭrahandlu» pasłuhi pa hruzapieravozkach.
U «Jeŭrahandli» admaŭlajuć hetuju infarmacyju i kažuć, što prosta pradajuć siertyfikaty roznym pradpryjemstvam.
Ciapier čytajuć
«Ja tolki adnaho chaču: kab vy pavieryli mnie znoŭ». Jak prajšła pieršaja akcyja Cichanoŭskaha ŭ Varšavie paśla vyzvaleńnia11
Kamientary