U šmatdzietnaj siamji ź Viciebska źnikli troje dziaciej, na ich pošuki aryjentavanaja milicyja ŭsioj Biełarusi, a taksama kalehi z pamiežža, paviedamiła BIEŁTA aficyjny pradstaŭnik UUS Viciebskaha abłvykankama Volha Škuratava.
Dva braty 18 i 16 hadoŭ, a taksama 15-hadovaja siastra syšli z doma, pakinuŭšy zapisku. Choć kryminalnaja sprava nie zavodziłasia, zajava baćkoŭ ad 7 sakavika pryniataja, pošukavyja mierapryjemstvy pravodziacca. Pa miescy žycharstva pabyvali supracoŭniki śledča-apieratyŭnaj hrupy, jany adpracavali ŭsie kantakty z telefonnych knih, pakinutych padletkami. Prahledzieli zapisy kamier videanazirańnia ŭ ludnych miescach, naprykład, u rajonie čyhunačnaha vakzała.
«Prykmiety dziaciej i fota razdadzienyja ŭsim patrulnym naradam. Pryčym na pošuk aryjentavany nie tolki narady pa Viciebskaj vobłaści, ale i pa ŭsioj respublicy, a taksama kalehi z pryhraničnych rajonaŭ Rasii», — raspaviała aficyjny pradstaŭnik UUS abłvykankama Volha Škuratava.
Abstaviny taho, što adbyłosia, raspavioŭ kiraŭnik siamji Rusłan Dzivin.
«U nas usiaho vosiem dziaciej. Starejšy syn ciapier žyvie ŭ Amierycy, vučycca va ŭniviersitecie. Astatnija tut z nami. Narmalna vučacca, niechta hulaje ŭ nastolny tenis, niechta zajmajecca muzykaj, chodziać da repietytara — karaciej, narmalnyja siamja. U toj dzień, 7 sakavika, Rusłan (18 hadoŭ), Cimur (16 hadoŭ) i Kacia (15 hadoŭ) pajšli ŭ škołu i źnikli. My daviedalisia pra heta, kali ŭviečary patelefanavała babula i skazała, što jany nie pryjšli da repietytara. Padazrajom, što jany mahli pasprabavać pakinuć krainu, tamu što ŭziali z saboj nieabchodnyja rečy, hrošy, svaje pašparty, ale pakinuli mabilnyja telefony ź biełaruskimi sim-kartami», — skazaŭ Rusłan Dzivin.
Pryčynaj sychodu z doma, na dumku baćki, mahło stać toje, što dzieci spałochalisia mahčymaha pakarańnia za drennyja pavodziny. Pra heta śviedčyć i pakinutaja chłopcami zapiska.
«My z žonkaj jeździli ŭ Maskvu pa spravach biznesu, dzieci zastavalisia pad nahladam babuli. Ad starejšaha syna, jaki kamunikavaŭ z małodšymi pa internecie, ja daviedaŭsia, što ŭ maju adsutnaść dzieci pakaštavali śpirtnoje i cyharety. Ja paabiacaŭ im, što, kali viarnusia, ich čakaje surjoznaja razmova», — rastłumačyŭ kiraŭnik siamiejstva.
«Spadziajomsia, što praź ŚMI ŭdasca dahrukacca da dziaciej, i jany sami viernucca», — dadaŭ Rusłan Dzivin.
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy25
Kamientary