У шматдзетнай сям'і з Віцебска зніклі трое дзяцей, на іх пошукі арыентаваная міліцыя ўсёй Беларусі, а таксама калегі з памежжа, паведаміла БЕЛТА афіцыйны прадстаўнік УУС Віцебскага аблвыканкама Вольга Шкуратава.
Два браты 18 і 16 гадоў, а таксама 15-гадовая сястра сышлі з дома, пакінуўшы запіску. Хоць крымінальная справа не заводзілася, заява бацькоў ад 7 сакавіка прынятая, пошукавыя мерапрыемствы праводзяцца. Па месцы жыхарства пабывалі супрацоўнікі следча-аператыўнай групы, яны адпрацавалі ўсе кантакты з тэлефонных кніг, пакінутых падлеткамі. Прагледзелі запісы камер відэаназірання ў людных месцах, напрыклад, у раёне чыгуначнага вакзала.
«Прыкметы дзяцей і фота раздадзеныя ўсім патрульным нарадам. Прычым на пошук арыентаваны не толькі нарады па Віцебскай вобласці, але і па ўсёй рэспубліцы, а таксама калегі з прыгранічных раёнаў Расіі», — распавяла афіцыйны прадстаўнік УУС аблвыканкама Вольга Шкуратава.
Абставіны таго, што адбылося, распавёў кіраўнік сям'і Руслан Дзівін.
«У нас усяго восем дзяцей. Старэйшы сын цяпер жыве ў Амерыцы, вучыцца ва ўніверсітэце. Астатнія тут з намі. Нармальна вучацца, нехта гуляе ў настольны тэніс, нехта займаецца музыкай, ходзяць да рэпетытара — карацей, нармальныя сям'я. У той дзень, 7 сакавіка, Руслан (18 гадоў), Цімур (16 гадоў) і Каця (15 гадоў) пайшлі ў школу і зніклі. Мы даведаліся пра гэта, калі ўвечары патэлефанавала бабуля і сказала, што яны не прыйшлі да рэпетытара. Падазраём, што яны маглі паспрабаваць пакінуць краіну, таму што ўзялі з сабой неабходныя рэчы, грошы, свае пашпарты, але пакінулі мабільныя тэлефоны з беларускімі сім-картамі», — сказаў Руслан Дзівін.
Прычынай сыходу з дома, на думку бацькі, магло стаць тое, што дзеці спалохаліся магчымага пакарання за дрэнныя паводзіны. Пра гэта сведчыць і пакінутая хлопцамі запіска.
«Мы з жонкай ездзілі ў Маскву па справах бізнэсу, дзеці заставаліся пад наглядам бабулі. Ад старэйшага сына, які камунікаваў з малодшымі па інтэрнэце, я даведаўся, што ў маю адсутнасць дзеці пакаштавалі спіртное і цыгарэты. Я паабяцаў ім, што, калі вярнуся, іх чакае сур'ёзная размова», — растлумачыў кіраўнік сямейства.
«Спадзяёмся, што праз СМІ ўдасца дагрукацца да дзяцей, і яны самі вернуцца», — дадаў Руслан Дзівін.
Цяпер чытаюць
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2727
Каментары