Top-10 papularnych biełaruskich Instagram-akaŭntaŭ na 2017 hod FOTY
Letaś «Naša Niva» składała śpis samych papularnych Instagram-akaŭntaŭ u našaj krainie. Praz hod my vyrašyli abnavić śpis, bo tam źjavilisia novyja asoby.
1. Daša Mart, 1,1 młn padpisantaŭ
Daša praciahvaje trymać miesca samaha papularnaha Instagram-akaŭnta ŭ Biełarusi. Za hod jaje aŭdytoryja vyrasła až na 500 tysiač padpisantaŭ.
Daša Mart — fatohraf i žonka chakieista minskaha kłuba «Junactva» Alaksandra Baraduli. A jašče jana maje samy papularny akaŭnt Instagram u Biełarusi. Na svajoj staroncy Daša lubić časta vykładać eratyčnyja i intymnyja foty, jakija nabirajuć pa dziesiać tysiač łajkaŭ.
2. Aksana Nieviasiołaja, 664 tysiačy padpisantaŭ
Novaja asoba, jakaja stała papularnaj u Instagram absalutna vypadkova. Pamiatajecie, jak brytanskija ŚMI pisali pra seksualnuju biełaruskuju nastaŭnicu? Dyk voś tady takija viadomyja resursy, jak Daily Mail, ukazali mienavita na akaŭnt hetaj dziaŭčyny. Navina akazałasia fejkam, bo na momant publikacyi dziaŭčyna tolki skončyła škołu. Adnak heta značna pavysiła papularnaść akaŭnta dziaŭčyny, i ciapier jana druhaja pa papularnaści ŭ biełaruskim siehmiencie Instagram.
3. Dzima Jermuzievič, 663 tysiačy padpisantaŭ
Adzin z samych papularnych videabłohieraŭ u Biełarusi. Na YouTube-kanał 19-hadovaha homielskaha chłopca padpisana bolš za 670 tysiač čałaviek. I takich ličbaŭ jon dasiahnuŭ usiaho za 6 hod. Chłopiec zdymaje videaroliki ŭ styli «lifestyle». Akaŭnt Dzimy zajmieŭ 600 tysiač padpisantaŭ mienš čym za dva hady.
4. Kaciaryna Koba, 441 tysiača padpisantaŭ
Kaciaryna Koba letaś užo była ŭ śpisie samych papularnych Instagram-akaŭntaŭ. Ale z druhoha miesca jana apuściłasia na čaćviortaje. Za hod jaje akaŭnt nie nadta vyras — usiaho na 23 tysiačy padpisantaŭ. Nahadajem što Kaciaryna — biełaruskaja fotamadel, televiadučaja kanała STB. Vialikaja papularnaść siarod zamiežnych karystalnikaŭ Instagram abumoŭlena mianuškaj Kaci — «biełaruskaja Barbi». Sapraŭdy, pahartaŭšy akaŭnt fotamadeli, možna znajści niešta padobnaje. Zvyčajna Kaciaryna vykładaje fotazdymki z pracy, lubić rabić sełfi i paviedamlaje padpisantam pra ŭsie svaje vandroŭki.
5. Jula Hadunova, 439 tysiačy padpisantaŭ
Siabroŭka Dzimy Jermuzieviča zastałasia na 5-m miescy. Ziamlačka papularnaha videabłohiera taksama maje svoj YouTube kanał, dzie jość 260 tysiač padpisantaŭ. Zdymaje videa dziaŭčyna ŭ asnoŭnym pra svajo žyćcio, roznyja čełendžy i dzielicca svaimi pakupkami z fanatami. Za hod jaje Instagram-akaŭnt vyras na 257 tysiač čałaviek.
6. Maks Korž, 348 tysiač padpisantaŭ
Čałaviek, jakoha, napeŭna, nie treba pradstaŭlać. Viadomy biełaruski cpiavak, jak sam śpiavaŭ, «žyvie ŭ kajf», praciahvaje dziakavać svaim fanatam za adryŭnyja kancerty i vystaŭlaje foty z roznych krain. Ciapier Maks pajechaŭ vandravać u Iran i adtul vystaŭlaje videa i fota svaich pryhod.
7. Valery Vivjer, 321 tysiača padpisantaŭ
Dla amataraŭ madelnych konkursaŭ hetaje imia budzie viadomaje. Valery — viadomaja madel, udzielnica konkursu «Top-madel śvietu—2015». Paśla ŭdziełu ŭ konkursie jaje akaŭnt staŭ značna bolš papularnym. Kali pahartać fotazdymki, možna zaŭvažyć, što madel — siabroŭka biełaruskaha televiadučaha i śpievaka Hiermana Citova, ale asnoŭnaja častka fota na jaje akaŭncie — heta sełfi i łuki z roznych haradoŭ, mierapryjemstvaŭ.
8. Alesia Astaševič, 271 tysiača padpisantaŭ
Letaś Alesia Astaševič była na 7-m miescy ŭ śpisie samych papularnych Instagram-akaŭntaŭ. Jaje aŭdytoryja za hod vyrasła na 136 tysiač padpisantaŭ. Alesia pracuje madellu ŭ Biełarusi i Rasii, a taksama ŭvachodzić u śpis barbi-madelaŭ. Dziaŭčyna stała papularnaj dziakujučy fota razam z kiraŭnikom dziaržavy na vokładcy školnaha bukvara. Dalejšaja madelnaja karjera Alesi praciahnułasia ŭ Maskvie, dzie žyvie jaje muž.
9. Liza Martynčyk, 267 tysiač padpisantaŭ
Biełaruskaja madel Liza Martynčyk u paraŭnańni ź minułym hodam apuściłasia až na 5 punktaŭ. Dziaŭčyna ź Ivacevičaŭ stała viadomaja dziakujučy niezvyčajnaj formie brovaŭ. Fotazdymki dziaŭčyny možna pabačyć u suśvietnaviadomych časopisach, a sama Liza zamacavanaja za dvuma madelnymi ahienctvami: Siarhieja Nahornaha i Al Models New York.
10. Uład Bumaha, 242 tysiačy padpisantaŭ
Zakryvaje dziasiatku samych papularnych Instagram-akaŭntaŭ Uład Bumaha — małady videabłohier, jaki bolš viadomy na YouTube jak «A4». Za try hady junak zajmieŭ 1,3 miljony prahladaŭ, dziakujučy svaim ryzykoŭnym, ale časam pastanovačnym rolikam. Adzin z samych papularnych jahonych rolikaŭ «Noč u začynienym akvaparku» nabraŭ 7 miljonaŭ prahladaŭ. Na svaim Instagram-akaŭncie chłopiec u asnoŭnym vystaŭlaje sełfi, zdymki z fotasiesij.
U nas taksama jość svoj akaŭnt u Instagram — @nashaniva. Padpisvajciesia, kab u nastupnym hodzie my stali samymi papularnymi:)
Kamientary