Milicyjant napisaŭ zajavu na žurnalista, jaki źvinavaciŭ jaho ŭ źbićci

Na źbitaha ŭ Leninskim RAUS Bieraścia Dzianisa Maruka, redaktara sajtu realbrest.by, major milicyi Ihar Šutnik napisaŭ zajavu.

Pavialičyć

Milicyjant, jaki, pavodle žurnalista, źbivaŭ jaho ŭ pastarunku, paličyŭ siabie abražanym za post u sacyjalnych sietkach, dzie Dzianis nazvaŭ jaho «sadystam».

Major milicyi Ihar Šutnik napisaŭ skarhu ŭ Leninski RAUS z patrabavańniem pryciahnuć da adkaznaści žurnalista za hetaje słova.

Praz hetuju zajavu redaktara sajtu ŭžo vyklikali ŭ RAUS, dzie byli ŭziatyja tłumačeńni.

Dzianisa Maruka zatrymali 28 sakavika. Pry hetym jaho žorstka źbili ŭ Leninskim RAUS. Dzianis śćviardžaŭ, što jaho bili hałavoj ab ścianu i padłohu, łyžkaj raściskali zuby.

Skarha milicyjanta źjaviłasia litaralna praź niekalki dzion paśla taho, jak Dzianis Maruk napisaŭ skarhu ŭ prakuraturu na supraćpraŭnyja dziejańni milicyjantaŭ. Akramia taho, redaktar źviarnuŭsia ŭ sud Leninskaha rajonu z prośbaj admianić administracyjnaje pakarańnie. Paśla ździekaŭ u RAUS Dzianisa aštrafavali na dźvie bazavyja vieličyni za drobnaje chulihanstva. Žurnalist nie žadaje mirycca z pakarańniem i katavańniami:

«Usio heta strašna, bo nasamreč takoje moža zdarycca z kožnym čałaviekam, jaki vyjšaŭ u kramu albo pa svaich spravach. Što da źbivańnia, to pra heta ja maŭčać anijakim čynam nia maju namieru. Heta niemahčyma daravać. Ja nie razumieju, na jakoj padstavie major milicyi Ihar Šutnik źbivaŭ mianie ŭ RAUS? Toje, što milicyjanty mianie dušyli — heta pahroza čałaviečamu žyćciu. Heta nie specsrodki, nie prafilaktyka. Mnie zdajecca, što mnohija bieraściejcy, žychary Biełarusi nia mohuć da hetaha času ŭjavić, što niešta padobnaje moža adbyvacca niedzie pobač. Tamu budu namahacca, kab mianie apraŭdali, a vinavatych pakarali. Ja razumieju ŭsiu sytuacyju: całkam vierahodna, što mianie buduć pieraśledavać, mohuć padkinuć narkotyki, zbroju, źbić mianie ci navat zabić, ale takija rečy prosta nielha daravać. Viedajecie, kali viartajeśsia dadomu, bačyš, jak płača žonka… Ja mocny čałaviek, šmat što mahu vytrymać, ale navaročvajucca ślozy na vočy, kali tvajo dzicia padychodzić i kaža, što ŭ taty huzak, tatu chiba balić. Ja nie raskazvaŭ pra hety vypadak svaim baćkam. Ale maci daviedałasia, patelefanavała mnie i płakała. Heta vielmi baluča. Asabliva za rodnych, jany vielmi mocna pieražyvajuć. Ale čaho b mnie heta ni kaštavała, ja budu patrabavać pakarańnia vinavatych».

• 0
• 0
• 0
• 0
• 0
• 0
• 0
• 0