Usiebiełaruskaja vadamieryzacyja

Nastupstvy Dyrektyvy №3 jašče daducca ŭ znaki biełarusam. Zhodna ź joj usie žychary krainy musiać na pačatku 2009 hodu mieć u chacie ličylniki chałodnaj i hračaj vady.

Napačatku ŭ Baranavičach pravodziłasia tłumačalnaja ahitacyja na staronkach miascovych hazetaŭ. Vodakanały i ŽKH prapanoŭvajuć za «nievialikuju» apłatu pastavić vam u kvatery vadamiery. Paśla apisvajucca ŭsialakija vyhody nakštałt «Chopić płacić za susieda».

Adnak takija miery, vidać, nia mieli vialikaha ŭpłyvu na prostych hramadzian. Tady vodakanał raspačaŭ akcyju «ad dźviarej da dźviarej». Žycharoŭ šmatpaviarchovikaŭ supracoŭniki vodakanału abychodzili j raskazvali toje, pra što pisali ŭ hazetach. Da taho ž harvykankamam była dazvolena novaja lhota. Kredyt. Ciapieraka nia treba płacić ŭsie hrošy adrazu. Vypłatu za ŭstalavańnie vadamieraŭ mahčyma raściahnuć na paŭhoda. Isnuje jašče i 20 % źnižka za vadu na niekalki hod, dla tych chto dałučycca da «akcyi» sioleta.

Hetkija lhoty mieli svoj vynik — narod pacichu pačaŭ ŭstaloŭvać vadamiery. Santechniki žyllova‑kamunalnych haspadarak i vodakanału pracujuć napoŭnicu. Štotydzień na maim padjeździe źjaŭlajucca abviestki pra adklučeńnie vady z 8:30 da 16:30 — zasaŭki nie trymajuć i dziela adnoj kvatery adklučajuć padjezd, kali nia całkam dom. Zrešty pra zasaŭki ŭ dyrektyvie ž ničoha nie napisana.

Źjavilisia j pieršyja achviary vadamieryzacyi. U niekaha vadamiery pačapili naŭprost na šlanhi, kab hojdalisia, bo truby hniłyja, a mianiać niama kali — jašče šmat kvater treba pieravieści ŭ režym ekanomii. Znajomaja ŭžo kolki miesiacaŭ dabivajecca praŭdy, karystajučysia «adnym aknom» i, jak jana kaža, siamiu dźviaryma. Padčas pastanoŭki vadamiera ŭ prybiralni, zvarščyk sapsavaŭ novuju kaflu. Kiraŭnictva taho ŽKH svajoj viny nie pryznała, maŭlaŭ treba było haspadaram praduhledzieć zvarnyja raboty i prykryć kaflu. U vykankamie paraili źviartacca ŭ sud. Šmat kamu pastavili tannyja rasiejskija ličylniki, jakija pa słovach samich vodakanalščykaŭ, nie prapracujuć bolš za hod. Niechta, viedajučy niadbajnaść i chiby kamunalščykaŭ, zrabiŭ ŭsio sam, ale jak vyśvietliłasia pry plambavańni, musić usio adno zapłacić napoŭnicu.

Pra sanitarnyja normy taksama nichto nie ŭspaminaje — paśla zvarnych rabot na vodapravodzie musić pravodzicca chlaravańnie trubaŭ. Ale dzie ž ty voźmieš hetulki chlorki j volnaha času. Sanstancyja pakul robić vyhlad, što ŭsio dobra.

Niahledziačy na hetkija akcyi i reklamnuju kampaniju, jašče znachodziacca asoby, što ihnarujuć dyrektyvu prezydenta. U ich liku pensijanery, jakija i rady by vykanać pa zvyčcy ŭsio rašeńni partyi, ale nia majuć na toje srodkaŭ, niahledziačy na źnižki.

Jak tłumačyŭ mnie adzin čałaviek, šmat chto čakaje, što vadzianyja ličylniki im pastaviać pry kancy hodu zadarma. Jak elektraličylniki. Prosta jany buduć ličycca nia ŭłasnaściu žychara kvatery, a kamunalščykaŭ.

Zrešty, ja taksama pakul nie «zavioŭ» sabie ličylnikaŭ. Nie ličycie mianie ciemrašałam. Prosta ekanamična, pry takich cenach na vadu mnie toje niavyhadna.

Adnapakajoŭka (małasiamiejkaj prazvanaja ŭ narodzie), zbudavanaja na pačatku 80‑ch, što ja zdymaju, maje dźvie asobnyja ŭrezki — na kuchni i ŭ vannym pakoi. Haspadar kvatery, vadamieryzirvacca admaŭlajecca, prapanavaŭ mnie, pry vialikim žadańni, pastavić ich samomu. Ustalavańnie čatyroch vadamieraŭ budzie kaštavać blizu 400 tysiač. Kažuć, što dziakujučy źnižkam ja budu płacić u miesiac niedzie 2000 rubloŭ za vadu. Pakul bieź ličylnikaŭ ja apłačvaju prykładna 7500. Kab tolki akupić ličylniki patrebna bolš 6 hod. Za tyja hady dzie Boh daść mnie žyć, chto jaho viedaje…

Na tym tydni na dźviarach majho padjezdu źjaviłasia abviestka, što zhodna z dyrektyvaju ŭsie žychary kamianicy PAVINNY ŭstalavać vadamiery ŭ pryznačany dzień. Na pradpryjemstvy Baranavič prychodziać listy z vodakanału sa śpisami tych chto uchiliŭsia ad hramadzianskaha abaviazku. Vodakanał prosić dyrektarat paŭpłyvać na svaich nieśviadomych supracoŭnikaŭ i prymusić vykonvać zakanadaŭstva. Kiraŭnictva vodakanału ŭ pryvatnych hutarkach pałochaje adklučeńniem vady dla sabatoŭcaŭ vadamieryzacyi. Źjavilisia plotki, što ŭ Homieli ŭžo pačali adklučać vadu tym, chto nia maje ličylnikaŭ.

Cisk padvyšajecca. Padajecca, što pry kancy hodu kamunalščyki lubymi srodkami chočuć mieć 99,9% vadamieraliziravanych žycharoŭ horadu. Kab adčytacca pierad uładami ab dasiahnutych pośpiechach. A paśla… a paśla, jak zaŭsiody ŭsie zabuducca na tyja vadamiery. I voźmucca za haza‑ ci ciepłaličylniki.

• 0
• 0
• 0
• 0
• 0
• 0
• 0
• 0