U Hrecyi pryznali «elinskuju etničnuju relihiju»

U centry Afinaŭ adbyŭsia pieršy abrad, jaki hreckija politeisty zładzili, atrymaŭšy novy status.

Abrad prajšoŭ pieršy raz z času, jak u pačatku krasavika ŭłady Hrecyi dali dazvoł, kab rytuały «elinskaj etničnaj relihii» rehularna prachodzili ŭ vyznačanym pamiaškańni ŭ stalicy krainy.

Pra heta havorycca ŭ aficyjnym liście, jaki Najvyšejšaja rada etničnych elinaŭ (YSEE) atrymała ad Ministerstva adukacyi i relihijnych spraŭ Hrecyi. List atrymany ŭ adkaz na zvarot pa dazvoł pravodzić svaje rytuały ŭ najaŭnym padrychtavanym pamiaškańni.

U liście fihuruje farmuloŭka «viadomaja relihija», jakuju, zhodna z hreckaj Kanstytucyjaj, treba mieć dla dziaržaŭnaha pryznańnia relihii. Taki status u Hrecyi ciapier majuć paŭdziasiatka relihij, a daminuje ŭ krainie pravasłaŭje.

Jakaja praktyčnaja karyść z taho pryznańnia? Kiraŭnik YSEE Ułasijas Rasijas u krasavickim interviju anhłamoŭnamu internet-časopisu «Dzikaje palavańnie» tłumačyć, što elinskija politeisty adhetul majuć prava pravodzić šlubnyja cyrymonii, jakija buduć pryznavacca dziaržavaj. Taksama ciapier možna rehistravać dziaciej, paznačajučy ich prynaležnaść da elinskaj etničnaj relihii.

Da hetaha statusu jany imknulisia 20 hadoŭ, ad 1997-ha, kali była zarehistravanaja hramadskaja arhanizacyja Najvyšejšaja rada etničnych elinaŭ — arhanizacyja parasonavaha typu dla pahanskich supołak u Hrecyi. U 2014 jany ŭžo sprabavali atrymać dziaržaŭnaje pryznańnie, ale tady nie vyjšła. Na siońnia aficyjnych udzielnikaŭ YSEE naličvajuć pad 2 tysiač čałaviek. Sami jany kažuć, što «ŭ toj ci inšaj miery zacikaŭlenyja» ŭ adrodžanych pahanskich kultach blizu 100 tysiač čałaviek pa ŭsioj krainie.

U hreckim vydańni Vice źjaviŭsia fotaapovied ź pieršaha aficyjnaha abradu.

U publikacyi Ułasijas Rasijas havoryć: «Dla nas boh — heta toje, što ŭmacoŭvaje žyćcio i ŭzmacniaje zakony pryrody. My nie zasiarodžvajemsia na liku ŭ dvanaccać bahoŭ, jak šmat chto miarkuje. Lik dvanaccać źjaŭlajecca simvaličnym, praź jaho paznačajecca paŭnata. Dla nas bahi — heta srodki, jakija spryjajuć viečnamu žyćciu i viečnaj jaho cykličnaści. My nie vierym, nibyta ŭ niebie jość relihijny buchhałtar, jaki viadzie ŭlikovyja knihi z našymi hrachami, kab pakarać nas, kali my pakiniem hety śviet».

Prykmietna, što pryznańnie «elinskaj etničnaj relihii» adbyvajecca ŭ toj ža čas, kali pa ŭsioj Jeŭropie paŭstajuć budavanyja pahanskija bažnicy: u Isłandyi dabudoŭvajuć, u Polščy pačynajuć budavać, u Łatvii na nastupnym tydni budzie vyśviačeńnie pieršaj budavanaj bažnicy łatyšskich pahanaŭ — dyjeŭturaŭ. Aproč taho, u traŭni ŭ Litvie pačynajuć praces dziaržaŭnaha pryznańnia ich pahanskaj supolnaści «Ramuva», bo ŭ krainie jany isnujuć užo bolš čym 25 hod, dyj čas u Litvie spryjalny — krainaj kiruje kaalicyja, utvoranaja «zialonymi» — simpatykami «ramuvoŭcaŭ».

• 0
• 0
• 0
• 0
• 0
• 0
• 0
• 0