Niašumnyja debaty

Vizyt deputata brytanskaha parlamentu Marka Prytčarda ŭ Miensk u traŭni 2008 hodu prajšoŭ faktyčna niezaŭvažany presaj, što było krychu dziŭnym, kali ŭličyć niekatoryja fakty.

Pa-pieršaje, sam fakt taho, što deputat parlamentu zachodniaj krainy atrymlivaje vizu ŭ Biełaruś, ukazvaje na toje, što hety vizit byŭ uchvaleny biełaruskimi ŭładami. Pa-druhoje, taki krok z boku ŭładaŭ zvyčajna maje vynikam toje, što vizytanta (kali jon nia ŭ składzie jakoj-niebudź delehacyi ABSE) sprabujuć vykarystać u pijar-metach — što z Prytčardam dakładna nie adbyłosia. Pa-treciaje, kali zvažać na hetyja abstaviny, toje, što spasyłki ŭ Internecie abmiežavalisia paviedamleńniami ab naviedvańni pratestanckaj carkvy i vykazvańni maralnaj padtrymki pryhniečanaj uładami kanfesii, vyhladała jak svajho kštałtu alibi dla spadara deputata — jon jak by adznačyŭsia unioskam u baraćbu za demakratyju.

Pra realny paradak dnia vizytu možna tolki zdahadvacca, ale jon staŭ namnoha bolš zrazumiełym dva miesiacy paźniej. Pieršyja za apošnija piać hadoŭ debaty ŭ brytanskim parlamencie pa biełaruskim pytańni, jakija adbylisia 16 lipienia, pryciahnuli dastatkova vysokapastaŭlenych pradstaŭnikoŭ uradu Vialikabrytanii, ich vynikam stała nia tolki pavyšeńni cikavaści da Biełarusi ŭ murach Vestminsteru, ale i ahučvańnie padychodaŭ u palitycy zachodnich krainaŭ adnosna Biełarusi, jakija mohuć znajści praciah u bližejšaj budučyni. Bolš za toje, stvaryłasia ŭražańnie, što pasłańni, ahučanyja padčas debataŭ, pryznačalisia mienavita dla Miensku.

Što datyčycca samoj persony Marka Prytčarda, to tut naŭrad ci mahčyma znajści niejkija vybitnyja fakty.

Jon adzin z tych deputataŭ brytanskaha parlamentu, jakich zazvyčaj nazyvać zadniałavačnikami.

Cikavyja fakty pra jahonuju parlamenckuju dziejnaść uklučajuć staršynstva ŭ pazafrakcyjnaj «rasiejskaj hrupie».

Tut, praŭda, treba adznačyć toje, što sami debaty ŭ brytanskim parlamencie ładziacca zhodna z strohaj i vyvieranaj praceduraj — zadniałavačniki atrymlivajuć takoje prava tolki ŭ vyniku svojeasablivaj latarei, i tamu toje, što debaty pra Biełaruś adbylisia ŭ taki čas — pierad parlamenckimi vybarami i adrazu paśla viadomych padziejaŭ u Miensku — było ŭ peŭnym sensie vypadkovaściu.

Adnak padčas debataŭ źviarnuli na siabie ŭvahu dva fakty. Pieršy — dastatkova vysoki ŭzrovień viedaŭ vystupoŭcaŭ ab padziejach u Biełarusi — dyskusija nie abmiežavałasia standartnym naboram frazaŭ ab harotnym stanie demakratyi ŭ krainie i nieabchodnaści prahresu z pravami čałavieka. Druhoj — u vystupach pradstaŭnika apazycyi i ministra ŭradu, jaki jamu adkazvaŭ, nie było jakich-kolviečy roznahałośsiaŭ, što dazvalaje zrabić vysnovu ab tym, što debaty adlustravali pazycyju aficyjnaha Londanu ŭ adnosinach Biełarusi.

Adnosiny Biełarusi z Zachadam nie pavinny stavicca ŭ zaležnaść ad jaje adnosin z Rasiejaj, i naahuł: pytańnie «Ŭschod ci Zachad» dla Biełarusi — heta niasłušnaja dychatamija.

Narmalizacyja adnosin ź Biełaruśsiu ŭ intaresach Brytanii i jaje hatovy padtrymać brytanski biznes («asabliva londanski Sici»). Adnak uvachodžańniu biznesu ŭ Biełaruś zaminaje reputacyja krainy. Dla jaje vypraŭleńnia patrebny realnyja, a nie dekaratyŭnyja pijar-kroki (što vyhladaje jak ukoł u bok łorda Beła i tych, chto jaho ŭ Biełaruś zaprasiŭ).

Cyvilizavanaja praviadzieńnie parlamenckich vybaraŭ uvosień 2008 hodu moža stać pačatkovaj kropkaj dla narmalizacyi adnosinaŭ. Pry hetym istotny nia stolki sam vynik vybaraŭ, kolki praces.

U zajavach Prytčarda i inšych udzielnikaŭ dyskusii niama ničoha novaha, što b nie ahučvałasia pradstaŭnikami eŭrastruktur ciaham za apošnija niekalki hadoŭ. Adnak,

u adroźnieńnie ad šmatlikich zajavaŭ z Bruselu, u debatach u anhielskim parlamencie prahladvałasia vyraznaja linija.

Z Brytanijaj u apošni čas skłalisia cikavyja adnosiny. Vizyt Abramoviča, mahčymyja intaresy ŭ Biełarusi Bierazoŭskaha, zaprašeńnie łorda dla «palapšeńnia imidžu» Łukašenki na Zachadzie. Padobna da handlu pamiž Biełarusiaj i Brytanijaj, asnoŭny pradmiet jakoj — pierapracavanaja rasiejskaja nafta (jakaja pradajecca, da taho ž, rasiejskim kantoram, zarehistravanym dzie-niebudź na brytanskich afšorach), adnosiny pamiž dźviuma krainami, padobna, tak ci inačaj pieraplatajucca ź biełaruska-rasiejskimi adnosinami. Ni da koha nie sakret, što na investycyi niekatorych z usim viadomym rasiejskich aliharchaŭ raźličvajuć biełaruskija ŭłady. Mahčyma, niekatorych užo dapuścili da biełaruskich aktyvaŭ praź cieniavyja schiemy. Jašče bolš imavierna, ich varta čakać u śpisie novych haspadaroŭ Biełarusi paśla taho, jak tut narešcie adbudziecca pryvatyzacyja. Mahčyma taksama, što praz svaich siabroŭ u Londanie biełaruskaja ŭłada prabivaje nia tolki investycyi, ale i eŭrapiejskaje pryznańnie, u minimalna dastatkovym dla padmacavańnia biełaruskaj uładnaj mašynie abjomie. Ale adnym łordam Bełam, vidać, abyścisia ciažkavata…

Nie biarusia śćviardžać, što Mark Prytčard – heta svojeasablivy suviazny pamiž aficyjnym Londanam, Sici i biełaruskimi ŭładami

Takim čynam, ujavim, što padčas debataŭ u brytanskim parlamencie Mark Prytčard ahučvaŭ pazycyju mienavita tych kołaŭ Brytanii, na jakija raźličvaje aficyjny Miensk. Pole dla prahmatyčnaha anhažavańnia biezumoŭna jość, ale minimum prystojnaści nieabchodny dla zabieśpiačeńnia mižnarodnaha pryznańnia i dla stvareńnia bolš kamfortnych umovaŭ kapitałam, jakija pavinny siudy pryjści. Kali spadar Prytčard kazaŭ nia tolki ad siabie samoha, to pasłańnie da biełaruskich uładaŭ ukazvaje na toje, što ŭ niekatorych pieramienach u krainie zacikaŭlenyja i mahčymyja partnery i siabry biełaruskich uładaŭ. Prynamsi, było b krychu dačasnym śćviardžać sa stoadsotkavaj upeŭnienaściu, što parlamenckija vybary zusim nie pryniasuć anijakich siurpryzaŭ.

• 0
• 0
• 0
• 0
• 0
• 0
• 0
• 0