Bieraściejski hieroj-afhaniec: Ja ŭ svajoj krainie, a nie ŭ akupavanaj Rasijaj 

Bieraściejski vieteran vajny ŭ Afhanistanie Alaksandr Sacharuk razharnuŭ bieł-čyrvona-bieły ściah padčas štohadovaj akcyi «Nieśmiarotny połk», jakaja pravodzicca kožnaha 9 traŭnia ŭ horadzie.

Pavodle infarmacyi miascovych pravaabaroncaŭ, Alaksandr adrazu ž byŭ zatrymany.

Alaksandr Sacharuk trapiŭ na słužbu ŭ Afhanistan u vasiamnaccać hadoŭ, byŭ uznaharodžany miedalom «Za advahu», ciapier źjaŭlajecca siabram niezaležnaha Prafsajuza rabotnikaŭ radyjoelektronnaj pramysłovaści (REP).

Pravaabarončaje vydańnie «Bieraściejskaja viasna» apublikavała novyja padrabiaznaści ŭčorašniaj akcyi Alaksandra Sacharuka. 

«Ja vyrašyŭ prajści ŭ śviatočnaj kałonie pad bieł-čyrvona-biełym ściaham. Heta dla mianie simvał Svabody. Pad čyrvonym ściaham nas uvodzili ŭ Afhanistan. Skazali, što treba ŭvajści chutka, kab amierykancy tam svaje rakiety nie raźmiaścili. Mnie było 18 hadoŭ. Ja vieryŭ kamunistyčnaj prapahandzie. Ciapier ja inakš hladžu na žyćcio. Nas zaŭsiody padmanvali. Za što našy prodki vajavali? Kab my žyli ŭ halečy i pry dyktatury? Pracy niama. Adna milicyja paŭsiul. Nie pracujuć, a hrošy atrymlivajuć», — raspavioŭ pravaabaroncam i žurnalistam vieteran-afhaniec u pačatku šeścia. «Paŭsiul rasijskija ściahi i šaŭrony! Nichto ich nie zatrymlivaje i nie kranaje. Bieł-čyrvona-biełym ściaham ja chaču skazać, što žyvu ŭ svajoj krainie, a nie ŭ akupavanaj Rasijaj. Svaju ziamlu budu abaraniać, niezaležna ad taho, čyj bot na jaje stupić!» — zajaviŭ vieteran-afhaniec.

«Bieraściejskaja viasna» padrabiazna apisvaje reakcyju milicyjantaŭ na nacyjanalny ściah u rukach hieroja Afhanistana:

«Nieŭzabavie da jaho padyšli ludzi ŭ cyvilnym:

— Prybiarycie ściah!

— Ja ŭ svajoj krainie i ŭvažaju, što hety ściah — naša nacyjanalnaja hodnaść! Heta ściah našaj niezaležnaści, — adkazaŭ afhaniec».

Fota: RACYJA.COM

Padrabiaznaści zatrymańnia hieroja-afhanca raspavioŭ «Radyjo Racyja» jahony siabar i śviedka padziej: jaki pažadaŭ zastacca ananimnym:

— Padyšli dvoje ŭ cyvilnym: davajcie, prybiarycie ściah. A jon adkazvaje: a čamu ja pavinien prybrać, kali jon nacyjanalny, heta — maja hordaść? Tady padyšoŭ treci, i jany jaho adrazu ŭziali pad ruki, ściah zabrali i paviali. Tam niepadalok stajała chutkaja, da jaje jaho i paviali, tudy potym pryjechała milicejskaja mašyna. Hladžu, jany pačali ab čymści šušukacca, a potym padyšli da mianie. Maŭlaŭ, što vy tut robicie, jak vaša zdaroŭje? Ja im kažu: chłopcy, čaho vy da mianie čaplajeciesia?

Pavodle infarmacyi pravaabaroncaŭ, Alaksandr Sacharuk dastaŭleny ŭ Leninski RAUS Bieraścia.

• 0
• 0
• 0
• 0
• 0
• 0
• 0
• 0