Natali Raše.
Televiadučaja Natali Raše raspaviała svaim padpisantam u instahramie dziŭnuju historyju, jakaja zdaryłasia ź joj niekalki dzion tamu kala Astrašyckaha haradka. Inśpiektar DAI nibyta aštrafavaŭ jaje zamiest taho, kab dapamahčy.
«Naša Niva» datelefanavałasia da Natalli, kab vyśvietlić padrabiaznaści:
«My jechali adviedać chvoraha čałavieka. Ja niapravilna zrazumieła adras i zajechała nie z taho boku. My šukali pravilnuju darohu, i tym časam majmu dziciaci stała błaha ŭ mašynie. Ja pamiatała, što pobač tam zaŭsiody staić DAI i my pajechali da ich. (Kala Astrašyckaha haradka pastajanna dziažurać patruli, bo pobač znachodziacca rezidencyja Alaksandra Łukašenki i škoła, dzie vučycca jaho syn Mikałaj — Red.). Ja metanakiravana padjechała da ich i, adčuvajučy stres, nie asabliva zadumvałasia, dzie mnie treba parkavacca. Nie paśpieła zahłušyć mašynu, jak da mianie vybieh supracoŭnik DAI. Ja skazała jamu, što źviartajusia da jaho pa dapamohu.
A jon paprasiŭ mianie prajści ŭ mašynu: maŭlaŭ, ja parušyła praviły darožnaha ruchu. Ja znachodziłasia ŭ lohkim stanie afiektu, bo chvalavałasia za dzicia. Tamu ja prasiła, kab inśpiektar jak maha chutčej aformiŭ mianie. Kaniečnie, dzieści ja pavyšała ton, ale tolki praz toje, što chacieła chutčej pajechać u najbližejšy miedpunkt.
Składańnie pratakołu zaniało kala 20-30 chvilin i ŭ vyniku ja atrymała dźvie bazavyja vieličyni za paŭtornaje parušeńnie raźmietki.
Na maju dumku, jon jak minimum pavinien byŭ vyklikać chutkuju dapamohu, pry mahčymaści supravadzić u balnicu! Ja siadzieła i płakała ŭ mašynie, a paśla taho, jak jon nas adpuściŭ, u majoj dački pačałasia isteryka, bo jana raschvalavałasia za mianie.
Paśla my adjechali trochi, i praź niejki čas dačce stała lepiej. Ja nie maju prava pra heta maŭčać, tamu źbirajusia pravučyć jaho. I sprava nie ŭ štrafie, mnie nie treba, kab viartali hrošy, mnie pavinny byli prosta akazać dapamohu. Mnie było vielmi niepryjemna, što pierad mnoju siadzić mužčyna z zaručalnym piarścionkam, jaki tak abyjakava stavicca da žančyny, jakaja prosić u jaho dapamohi. Jon staić na varcie, ja chaču, kab jon uśviedamlaŭ, što kiepska zrabiŭ! Atrymlivajecca, što bajacca treba nie złačyncaŭ, a takija orhany ŭłady. Mnie rajać nie źviazvacca ź sistemaj, ale ja daviadu hetuju spravu da kanca».