Chakiejny kłub «Dynama-Minsk» płanuje całkam admovicca ad pasłuh lehijanieraŭ. Ab hetym pa vynikach dakłada Alaksandru Łukašenku zajaviŭ žurnalistam ministr unutranych spraŭ, staršynia naziralnaj rady CHK «Dynama-Minsk» Ihar Šunievič.
«Kiraŭniku dziaržavy była prapanavana novaja kancepcyja raźvićcia chakiejnaha kłuba «Dynama-Minsk». Adnym z kirunkaŭ hetaj kancepcyi źjaŭlajecca pierśpiektyŭnaja i poŭnaja admova ad pasłuh lehijanieraŭ, u tym liku ŭ trenierskim štabie», — skazaŭ Ihar Šunievič.
Pavodle jaho słoŭ, heta zaduma ŭ cełym uchvalena prezidentam. «Nakolki heta možna efiektyŭna i chutka zrabić, ja paviedamlu kiraŭniku dziaržavy ŭ bližejšy čas pa jaho daručeńni, praličyŭšy ŭsie našy kroki i mahčymaści, u tym liku finansavyja, dla realizacyi takoj zadumy», - adznačyŭ staršynia naziralnaj rady kłuba.
Adkazvajučy na pytańnie, Ihar Šunievič paćvierdziŭ, što razmova ŭ tym liku idzie pra admovu ad lehijanieraŭ siarod hulcoŭ. «My chočam stymulavać naš nacyjanalny chakiej, našu nacyjanalnuju chakiejnuju škołu. I adnym sa sposabaŭ takoha stymulavańnia znachodzim mahčymaść admovy ad zamiežnaj dapamohi», - zajaviŭ jon.
Što da mahčymych terminaŭ dla realizacyi prapanovy, Ihar Šunievič skazaŭ: «Dumaju, što zaduma budzie realizavana ŭžo ŭ hetym siezonie».
Staršynia naziralnaj rady CHK «Dynama-Minsk» taksama paviedamiŭ Alaksandru Łukašenku ab pačatku kamplektavańnia kamandy na budučy siezon i inšych pytańniach u dziejnaści kłuba.
Kamientary